"Sarsılmaz Tərəfdaşlıq-2025" birgə XTQ təlimi keçirilir

İkitərəfli əməkdaşlıq planına uyğun olaraq, Azərbaycan Ordusunun Xüsusi Təyinatlı Qüvvələri (XTQ) və Birləşmiş Ərəb Əmirliklərinin (BƏƏ) Prezident Qvardiyasının Xüsusi Əməliyyat Komandanlığı bölmələrinin iştirakı ilə "Sarsılmaz Tərəfdaşlıq-2025" birgə xüsusi təyinatlı qüvvələr təlimi keçirilir. Müdafiə Nazirliyinin verdiyi məlumata görə, təlimin təntənəli açılış mərasimi oktyabrın 21-də təşkil edilib. Mərasimdə əvvəlcə Azərbaycanın və BƏƏ-nin şəhidlərinin xatirəsi bir dəqiqəlik sükutla yad edilib.

Hərbi orkestr müşayiət etdikcə, hər iki ölkənin Dövlət himnləri səsləndirilib və Dövlət bayraqları qaldırılıb. Tədbirdə Azərbaycan Ordusunun Xüsusi Təyinatlı Qüvvələri (XTQ) komandanı, general-mayor Ələkbər Cahangirov çıxış edib. O qeyd edib ki, bu təlim ölkələrin XTQ mənsubları arasında əməkdaşlığı genişləndirmək məqsədi daşıyır. Eyni zamanda, təlimlər praktiki vərdişləri təkmilləşdirməyə, qarşılıqlı təcrübə mübadiləsinə və hərbi qulluqçuların peşəkar inkişafına kömək edəcək.

Təlim iştirakçıları real döyüş şəraitinə uyğunlaşdırılmış ssenarilər üzrə qarşılıqlı koordinasiya və idarəetmə bacarıqlarını inkişaf etdirəcəklər. Taktiki fəaliyyətlər zamanı manevr qabiliyyəti, çeviklik və liderlik vərdişləri təkmilləşəcək. Bölmələr zirehli texnika, ordu aviasiyası və pilotsuz uçuş aparatlarının cəlb edildiyi mühitdə çalışacaqlar. Onlar atəş, desantlaşma, snayper fəaliyyəti, düşmən obyektlərinin sıradan çıxarılması və yaşayış məntəqəsinin düşməndən təmizlənməsi kimi döyüş taktikaları üzrə təlim-döyüş tapşırıqlarını yerinə yetirəcəklər. Təlim iştirakçıları həm də hər iki ölkənin xüsusi təyinatlılarının təcrübəsindən öyrənərək, yeni forma və üsulları mənimsəyəcəklər.