Şirniyyat qutularının içərisində gizlədilən dərman preparatları aşkar edilib (FOTO)

Hava Nəqliyyatında Baş Gömrük İdarəsinin əməkdaşları ölkə ərazisinə qanunsuz yolla gətirilmək istənən dərman preparatlarının qarşısını alıb. Bu hadisə Gəncə Beynəlxalq Aeroportunda qeydə alınıb. Gömrük orqanlarının həyata keçirdiyi tədbirlər nəticəsində Azərbaycan vətəndaşına məxsus əşyalara baxış keçirilib.

Vətəndaş İstanbul-Gəncə aviareysi ilə gəlirdi. O, aeroportun gəliş zalında olarkən, onun əşyaları rentgen aparatından keçirilib. Monitorda həmin əşyaların təsviri zamanı şübhəli görüntülər müşahidə edilib. Bundan sonra vətəndaşa məxsus çantanın dərindən yoxlanılmasına başlanılıb. Yoxlama göstərib ki, yük əvvəlcədən gömrük nəzarətinə təqdim edilməyib, həmçinin şifahi və ya yazılı formada bəyan olunmayıb.

Aparılan yoxlama zamanı dərman preparatlarının xüsusi üsulla gizlədildiyi məlum olub. Preparatlar üzəri şirniyyatla örtülmüş qutuların içərisinə qoyulmuşdu. Ümumilikdə 645 konvolyut “Lioresal” markalı dərman preparatı aşkar edilib. Hər bir konvolyutda 10 həb yerləşirdi. Gəncə Beynəlxalq Aeroportunda aşkarlanan bu qaçaqmalçılıq faktı ilə bağlı araşdırma aparılır.