Son beş ildə 412 nəfər mina partlayışından zərər çəkib

44 günlük Vətən müharibəsi başa çatandan bəri 412 nəfər mina partlayışları nəticəsində ziyan görüb. Xarici İşlər Nazirliyi (XİN) bu barədə məlumat yayıb.

Nazirlik bildirir ki, minaların mülki şəxsləri hədəfə alması beynəlxalq humanitar hüququn ciddi şəkildə pozulmasıdır. Bu hadisələr bərpa və yenidənqurma proseslərini ləngidir, eyni zamanda insanların təhlükəsiz şəkildə öz yaşayış yerlərinə qayıtmasına mane olur. XİN bəyan edib ki, bu cür hallar genişmiqyaslı və sürətləndirilmiş mina təmizləmə əməliyyatları üçün beynəlxalq dəstəyin təcili lazım olduğunu göstərir. Təhlükəsizliyin bərpası işğaldan azad edilmiş ərazilərdə normal həyata qayıdışın əsas şərtidir.

Məlumatda, həmçinin, Ermənistanla sərhəd bölgədə baş vermiş son hadisəyə də yer verilib. Noyabrın 17-də Qazax rayonunun Bala Cəfərli kəndi ərazisində mina partlayışı baş verib. Agentliyin əməkdaşı, 1988-ci il təvəllüdlü İmamverdiyev Samir Mübariz oğlu xidməti vəzifəsini yerinə yetirərkən piyada əleyhinə minaya düşmüşdü. Hadisə nəticəsində əməkdaşın sağ ayağı topuq hissəsindən amputasiya edilib. Bu faciəvi hadisə, müharibə bitdikdən sonra belə, mülki şəxslər üçün minaların yaratdığı ağır təhlükəni bir daha sübut edir.