Sorğu: Makronun reytinqi düşməkdə davam edir

Ölkə daxilində təhlükəsizlik məsələləri ilə bağlı narahatlıqlar Fransa Prezidenti Emmanuel Makronun cəmiyyət içindəki nüfuzuna zərbə vurur. "Le Journal du Dimanche" qəzeti Fransa İctimai Rəy İnstitutunun (IFOP) keçirdiyi sorğuya əsaslanaraq bu barədə məlumat yayıb. Daxili təhlükəsizlik Makronu narahat edən əsas məsələ olaraq qalır. Məsələn, Marseldə narkotik vasitələrin qanunsuz dövriyyəsi prezidentin 15 dəfə səfər etməsinə baxmayaraq hələ də səngiməyib.

Bundan əlavə, geniş "Böyük Marsel" şəhərsalma planı da gözlənilən nəticəni verməyib. Sorğunun nəticələri göstərir ki, respondentlərin cəmi 16%-i Makronun prezident kimi fəaliyyətindən razıdır. Bununla yanaşı, respondentlərin 84%-i ona mənfi qiymət verib. Narazı seçicilərin ümumi nisbəti oktyabrda keçirilən sorğu ilə müqayisədə sabit qalıb, lakin Makrondan "qəti şəkildə narazı olanların" payı 56%-ə yüksəlib. Bu, iki faiz bəndi artım deməkdir. İnstitutun direktoru Frederik Dabie düşünür ki, Makron bu seçiciləri geri qazana bilməz.

Prezidentin təyin etdiyi baş nazir Sebastien Lekornu da Makronun qeyri-populyarlığının qurbanına çevrilib. O, 66% mənfi cavab alıb ki, bu da bir ayda dörd faiz bəndi artım deməkdir. Lekornu Makrona həddən artıq loyallıq və nəticə əldə edə bilməmək ittihamları ilə üzləşməyə başlayıb. Baxmayaraq ki, o hələ də siyasi qüvvələrlə dialoq aparmağa qadir hesab edilir. Nəşri, Makronun mübahisəli pensiya islahatını dayandırmaq üçün 2026-cı il büdcə qanun layihəsinə düzəliş etməklə atdığı addımın tamamilə diqqətdən kənarda qalmasına təəccüblənir.

Bu düzəlişin Senatda (parlamentin yuxarı palatası) ləğv ediləcəyi vəd edilib. Beləliklə, onun büdcənin yekun variantında qalıb-qalmayacağı bəlli deyil. Bu sorğu noyabrın 13-dən 21-dək 2000 fransız arasında aparılıb. Nəticələr Makronun daxili siyasətdə ciddi problemlərlə üzləşdiyini göstərir, xüsusən də daxili təhlükəsizlik məsələsində ictimai inam aşağı düşüb.