Vətən müharibəsi ilə bütün dünya gördü ki, Azərbaycan Ordusu istənilən döyüş əməliyyatını mükəmməl şəkildə yerinə yetirə bilər - Ehtiyatda olan kapitan

Ehtiyatda olan kapitan Ramil Bədəlov bəyan edib ki, Vətən müharibəsi ilə biz bütün dünyaya sübut etdik: Azərbaycan Ordusu istənilən döyüş əməliyyatını ən yüksək səviyyədə icra edə bilər. O, 8 Noyabr – Zəfər Günü münasibətilə verdiyi açıqlamada bu qələbənin həm xalq, həm də ordumuz üçün müstəsna əhəmiyyət daşıdığını bildirib. Kapitan Bədəlov Aprel döyüşləri, 44 günlük Vətən müharibəsi və son antiterror əməliyyatlarında iştirak edib. O, bu gün qələbənin beşinci ilini qeyd etməkdən qürur duyduğunu söyləyib. Xalqımıza bu qələbə sevincini yaşatmaq əsgər və zabitlərin müqəddəs borcu idi. O əlavə edib ki, hərbçilər həmin vəzifənin öhdəsindən layiqincə gəldilər. Bu uğurlar bir daha göstərdi ki, Azərbaycan Ordusu dünyanın ən güclü və peşəkar ordularından biridir.

Ramil Bədəlov vurğulayıb ki, bütün dünya Azərbaycan Ordusunun necə mükəmməl döyüşdüyünə şahid oldu. Biz bunu xüsusilə Şuşa döyüşlərində sübut etdik. O qeyd edir ki, həmin döyüşlər bir çox ölkələrin orduları üçün qeyri-mümkün hesab edilən əməliyyatlar idi. Azərbaycan əsgərləri yalın əllərlə qayalara dırmandılar, düşməni məhv etdilər və şəhəri azad etdilər. Bu əməliyyat eyni zamanda həm böyük qəhrəmanlığın nümunəsi, həm də milli ruhun zirvəsi idi. Bu cür mürəkkəb şəraitdə qazanılan nailiyyətlər Azərbaycan Silahlı Qüvvələrinin hazırlıq səviyyəsini aydın göstərir. Bu qələbə ilə ordumuz ən çətin tapşırıqları belə uğurla başa çatdırmağa qadir olduğunu sübuta yetirdi.

Ehtiyatda olan zabit bu tarixi gün münasibətilə Ali Baş Komandan başda olmaqla bütün xalqımızı və Silahlı Qüvvələrin şəxsi heyətini təbrik edib. O, bu zəfərin memarı olan Ali Baş Komandana, həmçinin ordunun bütün qəhrəman zabit və əsgərlərinə dərin minnətdarlığını bildirib. Ramil Bədəlov eyni zamanda bu qələbənin əldə edilməsində canını fəda etmiş şəhid qardaşlarımıza Allahdan rəhmət diləyib və onların ruhu qarşısında baş əyib. Kapitan Bədəlov yekun olaraq əlavə edib ki, 8 Noyabr – Zəfər Günü yalnız Azərbaycanın deyil, bütün türk dünyasının şərəf və birlik rəmzi kimi yadda qalacaq. Bu qələbə xalqımızın birliyinin, dövlətimizin gücünün və igid oğullarımızın qanı ilə yazılmış unudulmaz tarixdir. O, nəsillər boyu qürurla xatırlanacaq.