Vətən Müharibəsi Qəhrəmanı Ramiz Qasımovun anım mərasimi keçirilib (FOTO)

Vətənimizin ərazi bütövlüyü uğrunda şəhidlik zirvəsinə ucalan Vətən Müharibəsi Qəhrəmanı Ramiz Qasımovun xatirəsinə həsr edilmiş anım mərasimi keçirildi. Müdafiə Nazirliyi bu barədə məlumat yayıb. Mərasim şəhidin igidliyinin yad edilməsi məqsədi daşıyırdı.

Tədbirdə Müdafiə Nazirliyinin əməkdaşları, ictimaiyyət nümayəndələri, Milli Qəhrəmanın ailə üzvləri, yaxınları və döyüş yoldaşları iştirak ediblər. Əvvəlcə xalqımızın Ümummilli Lideri Heydər Əliyevin, eləcə də Azərbaycanın müstəqilliyi, ərazi bütövlüyü və suverenliyi uğrunda şəhid olan bütün şəxslərin xatirəsi bir dəqiqəlik sükutla yad edildi. Daha sonra Azərbaycan Respublikasının Dövlət Himni səsləndirildi.

Anım mərasimində çıxış edənlər Müzəffər Ali Baş Komandanın rəhbərliyi altında Ordumuzun Vətən müharibəsində qazandığı tarixi Qələbədən bəhs etdilər. Onlar bu şanlı Zəfərin əldə olunmasında Ramiz Qasımov kimi igid oğullarımızın göstərdikləri qəhrəmanlıq və şücaət nümunələrini xüsusi vurğulayıblar. Şəhidin şərəfli həyat yolu haqqında geniş məlumat verilib. Vətən Müharibəsi Qəhrəmanının ailə üzvləri və yaxınları onlara göstərilən diqqət və qayğıya, eləcə də şəhidlərimizin xatirəsinin daim uca tutulmasına görə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə və Birinci vitse-prezident Mehriban xanım Əliyevaya təşəkkürlərini bildirdilər. Ailə həmçinin Müdafiə Nazirliyinin rəhbərliyinə də minnətdarlığını çatdırıb.