Zəngilanın Ağalı kəndinə növbəti köç karvanı yola salınıb

Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdış prosesi davam etdirilir.

Proqram çərçivəsində Zəngilan rayonunun Ağalı kəndinə növbəti köç həyata keçirilib. Bu dəfə 41 ailə, ümumilikdə 110 nəfər öz doğma yurdlarına köçürülüb.

Ağalı kəndinə qayıdan bu sakinlər, əvvəllər respublikanın fərqli hissələrində məcburi köçkün kimi yaşayırdılar. Onlar əsasən yataqxanalarda, sanatoriyalarda və inzibati binalarda müvəqqəti məskunlaşmışdılar. Dövlət onların qayıdışını təmin edərək, hərtərəfli qayğı göstərib.

Doğma yurda qayıdan sakinlər onlara göstərilən bu dövlət qayğısına görə Prezident İlham Əliyevə və Birinci vitse-prezident Mehriban xanım Əliyevaya təşəkkürlərini çatdırıblar. Onlar həmçinin torpaqlarımızı işğaldan azad edən qəhrəman Azərbaycan Ordusuna, əsgər və zabitlərə minnətdarlıqlarını bildirib, bu yolda canlarından keçən şəhidlərə rəhmət diləyiblər.