“ATV” kanalına xəbərdarlıq edildi

Audiovizual Şura (AVŞ) 26 noyabr 2025-ci il tarixdə keçirilən onlayn iclasda “ATV” telekanalının fəaliyyətinə dair mühüm qərar verdi.

Şura kanalın efirində 13 noyabr 2025-ci il tarixdə yayımlanan "Gün ortası" proqramında baş vermiş hadisəni müzakirə etdi. Həmin verilişdə qonaq qismində dəvət edilmiş bir şəxs studiyada aparıcıya məsafədən "enerji ötürmə" üsulunu tətbiq etmişdi. Aparıcı isə seansdan sonra bu hərəkətlərə müsbət rəy vermişdi.

AVŞ aparatının Audiovizual proqramların monitorinqi və təhlili şöbəsinin mütəxəssisləri bu hərəkətləri qanun pozuntusu kimi qeydə aldılar. Fakt "Reklam haqqında" Qanunun 29.8-ci maddəsinin tələblərinə zidd idi. Bu maddə kütləvi müalicəvi seansların, hipnoz metodlarının, psixi və bioenerji təsirlərin müalicəvi xassələrinin reklamına icazə vermir. Şuranın hüquqşünasları da bu pozuntunu təsdiqlədilər.

Şura üzvləri məsələni detallı şəkildə müzakirə etdilər. Onlar yekdilliklə qənaətə gəldilər ki, proqramda göstərilən məsafədən "enerji ötürmə seansı" və aparıcının müsbət reaksiyası, bu üsulun müalicəvi xüsusiyyətlərə malik olması barədə yanlış təsəvvür yaradır. Aparıcının hərəkətlərin mümkün müalicəvi təsirini təşviq edən ifadələr işlətməsi faktiki olaraq qanunvericiliyin normasına zidd olaraq belə təsirlərin reklam edilməsinə şərait yaratmışdır. Bu hal "Reklam haqqında" Qanunun tələblərini pozmaq deməkdir.

Sonda Audiovizual Şuranın üzvləri, kanalın efirində belə bir pozuntunun ilk dəfə baş verməsini nəzərə alaraq, "ATV" telekanalına rəsmi xəbərdarlıq edilməsi barədə qərar qəbul etdilər. Şura bütün yayımçılardan proqramları yayımlayarkən qanunvericiliyin tələblərini əsas götürmələrini tələb etdi.