AzTV-də maliyyə pozuntusu aşkarlandı

“Azərbaycan Televiziya və Radio Verilişləri" (AzTV) QSC-də dövlət vəsaitlərinin və digər əmlakın idarə olunması ilə bağlı auditin nəticələri ictimaiyyətə təqdim edilib. Bu yoxlama AzTV-də maliyyə pozuntusu aşkar edib.

Məsələ Azərbaycan Respublikası Hesablama Palatasının "2026-cı il dövlət büdcəsinin layihəsinə rəyi"ndə əksini tapıb. Audit nəticələrinə görə, AzTV QSC əmək müqaviləsi ilə fəaliyyət göstərən işçilərə əməkhaqqı formasında ödənilməli olan vəsaitləri "qonorar" adı altında rəsmiləşdirərək ödəyib. Bu yanlış təsnifat həm əmək, həm də vergi qanunvericiliyi ilə uyğunsuzluğa səbəb olub.

Ümumilikdə, 2023-cü ildən 2025-ci ilin birinci rübü daxil olmaqla, 26 mln. manat məbləğində vəsait bu şəkildə ödənilmişdi. Məbləğ 2023-cü ildə 11.3 milyon manat, 2024-cü ildə 11.6 milyon manat, 2025-ci ilin birinci rübündə isə 3.1 milyon manat təşkil edir. Bu, əmək münasibətlərinin mülki-hüquq münasibətləri kimi yanlış təsnif edilməsi idi.

Yanlış təsnifatın əsas nəticəsi məcburi sosial ayırmaların tam həcmdə tutulmaması oldu. Bu hal, sonda, AzTV işçilərinin sosial təminat hüquqlarının məhdudlaşdırılması ilə yekunlaşıb. Hesablama Palatasının rəyi bir dövlət qurumunda böyük həcmdə vəsaitin qanunvericiliyə zidd şəkildə idarə olunduğunu göstərir.