Bu ayaqqabılar sağlamlıq üçün risklidir - FOTO

Bəzi mağazalarda cəmi 3-5 manata ayaqqabıların satıldığı görünür. Bu qiymətə satılan məhsulların keyfiyyəti haqqında ciddi narahatlıqlar var. İnsanlar ucuz Çin istehsalı ayaqqabıların dəriyə zərər verə biləcəyini, hətta bəziləri onların xərçəngə səbəb ola biləcəyini düşünürlər. Bəs bu ucuz məhsullar sağlamlığa nə dərəcədə təhlükəlidir?

Dermatonevroloq Zakir Abıyev bu məsələyə aydınlıq gətirib. O, bu ayaqqabıların birbaşa xərçəngə yol açacağını düşünmədiyini deyir. Lakin bu cür Çin məhsullarının tərkibində kimyəvi maddələr çoxdur. Bu maddələr dəri ilə birbaşa təmas etdikdə müxtəlif allergik xəstəliklər yarada bilir. Həkim onu da qeyd edir ki, ümumiyyətlə, bu tipli ayaqqabılar keyfiyyətsiz olur və tez xarab olur. O, ucuz ayaqqabı geyinənlərə mütləq corabdan istifadə etməyi tövsiyə edir.

Dermatoloq Tünzalə Əzizli də ucuz satılan ayaqqabıların təhlükəsini təsdiqləyib. Onun sözlərinə görə, tərkibi məlum olmayan bu keyfiyyətsiz məhsullar dəriyə ciddi zərər vurma ehtimalını artırır. Onlar allergik kontakt dermatitlərə səbəb olur, dəridə qıcıqlanma, qaşınma, qızartı və səpkilər yaradır. Bundan əlavə, belə ayaqqabılar ayaqda göbələk xəstəlikləri, normadan çox tərləmə və kəskin xoşagəlməz qoxu kimi problemlərə də yol aça bilər. Sağlamlığınızı qorumaq üçün məhsulların tərkibi barədə məlumatlı olmaq və keyfiyyətli mallara üstünlük vermək lazımdır. Əgər bu cür xoşagəlməz hallar müşahidə edilərsə, dərhal dermatoloqa müraciət etmək vacibdir.