Bu sürücülər cərimələnir?

“Yol Hərəkəti Haqqında” Qanuna əsasən, adi nəqliyyat vasitələri yalnız onlar üçün ayrılmış hərəkət zolaqları ilə getməlidir. Başqa zolaqlara daxil olmaq bu sürücülər üçün qadağandır. Bu vəziyyətdə sual ortaya çıxır: təcili yardım, yanğınsöndürən və digər operativ nəqliyyat vasitələri qanunu pozduqda 100 manat cərimələnirmi?

Bakı Şəhər DYP İdarəsinin bölmə rəisi, polis mayoru Toğrul Nəsirli bu məsələyə aydınlıq gətirib. O bildirib ki, operativ nəqliyyat dedikdə üzərində xüsusi rəng sxemi, yazılar, tanınma nişanları olan avtomobillər nəzərdə tutulur. Bu maşınlar eyni zamanda xüsusi işıq və səs siqnalları ilə təchiz ediliblər. Qanunvericiliyə görə, belə nəqliyyat vasitələrinin sürücüləri yol hərəkətinin digər iştirakçıları qarşısında üstünlük qazanmaq üçün mütləq sayrışan işıq və xüsusi səs siqnalını işə salmalıdırlar.

Mayor Nəsirli əlavə edib ki, bu sürücülər yalnız onlara yol verildiyinə tam əmin olduqdan sonra üstünlükdən istifadə edə bilərlər. Bu qaydalara riayət edildiyi halda, inzibati məsuliyyət tətbiq edilmir. Eyni zamanda, üstün hərəkət rejimindən istifadə edən nəqliyyat vasitələrinin sürücüləri digər yol hərəkəti iştirakçılarını təhlükə altına atmamaq şərti ilə qanunun müəyyən tələblərindən kənara çıxa bilərlər. Zərurət yarandığı zaman onlar daha yüksək sürətlə hərəkət edə bilərlər. Bununla yanaşı, onlar yol-nəqliyyat hadisələrinin qarşısını almaq üçün bütün zəruri tədbirləri görməyi öhdələrinə götürürlər. Beləliklə, şərtlər yerinə yetirildikdə cərimə tətbiqi ləğv olunur.