Dövlət dəstəyi fermerlər üçün böyük üstünlükdür - Ahmet Turgut

Kənd təsərrüfatı eksperti Ahmet Turgut Azərbaycanda Aqrar Sığorta Fondunun (ASF) fəaliyyətini yüksək qiymətləndirir. O, Fondun ölkə Prezidentinin dəstəyi ilə qurulduğunu qeyd edərək, təşəkkürünü bildirdi. Turgut vurğuladı ki, aqrar sığorta sistemi bütün dünyada kənd təsərrüfatı inkişaf etmiş ölkələrdə olmazsa-olmaz dəstək mexanizmidir. Ekspert Azərbaycan dövlətinin bu sahəyə təşviqlər göstərməsini fermerlər üçün çox böyük bir üstünlük hesab edir. Bu dəstək təbiət hadisələri səbəbindən yaranan gözlənilməz zərərlərin qarşısını almaq üçün vacibdir. Ahmet Turgut bu fikirləri Aqrar Sığorta Fondunun Xaçmaz rayonunun Nabran qəsəbəsinə təşkil etdiyi mediatur zamanı səsləndirib.

Ekspert sığortanın əhəmiyyətini öz təcrübəsi ilə izah etdi. Onun müxtəlif rayonlarda yerləşən fərqli bağları var və onların hamısı sığortalanıb. O, Xaçmazda yerləşən nektarin bağında baş vermiş şaxta hadisəsini xatırlatdı. Digər bağlarda heç bir problem yaranmasa da, təbiət hadisəsinin nə vaxt, hansı formada baş verəcəyini heç kim bilmir. Buna görə də riskləri nəzərə alaraq bütün təsərrüfatları sığortalamaq lazımdır. Turgut fermerlərə tövsiyə edir ki, Aqrar Sığorta Fondunun fəaliyyətini diqqətlə araşdırsınlar, nümayəndəliklərlə əlaqə saxlayıb ətraflı məlumat alsınlar. Bu məsələ həm ölkənin iqtisadi inkişafı, həm də qida təhlükəsizliyi üçün çox önəmlidir.

Ahmet Turgut Aqrar Sığorta Fondunun operativliyindən çox razı qalıb. O, Mart ayında baş vermiş şaxta hadisəsi barədə ətraflı məlumat verdi. Bağ sahibinin sözlərinə görə, onların təsərrüfatlarında öz meteoroloji stansiyaları var və bütün dəyişiklikləri dəqiqəlik izləyirlər. Həmin gün heç bir şaxta proqnozu olmasa da, meyvə görünənə qədər təhlükə vəziyyəti qalır. Saat 11 radələrində temperaturun mənfi 0.5 dərəcəyə düşdüyü aşkarlandı. Bundan sonra tüt-su aparatları işə salındı və bağ suvarıldı. Bütün bu tədbirlərə baxmayaraq, xüsusilə erkənçi sortlarda şaxta zərəri yarandı.

Hadisə baş verən kimi Aqrar Sığorta Fondu dərhal əraziyə gəldi. Fondun nümayəndələri baxış keçirdi, sənədləşmə işlərini apardı. Proses izlənildikdən sonra sığorta ödənişi təmin olundu. Ekspert bu dəstəyə görə bir daha təşəkkür etdiyini bildirdi. Ahmet Turgut çıxışının sonunda bütün fermerləri öz bağlarını mütləq şəkildə sığortalamağa çağırdı. Bu, təsərrüfatlarını gözlənilməz risklərdən qorumaq üçün yeganə yoldur.