Hər kəsin aldığı bu məhsul bahalaşdı

Marketlərdə hər kəsin aldığı məhsullardan biri olan plastik torbaların qiyməti 2 qəpik qalxdı. Bu artımın ardından kiçik plastik torbalar 5 qəpiyə, böyük ölçülü torbalar isə 7 qəpiyə satılır. Bəs bu bahalaşmanın arxasında hansı səbəblər durur?

İqtisadçı ekspert Xalid Kərimli məsələyə aydınlıq gətirib. O bildirdi ki, dövlət plastik və polietilen torbaların pullu olması tələbini irəli sürsə də, onların satış qiymətini tənzimləmir. Ekspertin sözlərinə görə, ehtimal var ki, polietilen torbaları istehsal edən müəssisə qiymətləri özbaşına artırıb. Kərimli qeyd edib ki, bu məhsulun qiyməti ölkədə qiymətləri müəyyən etmək səlahiyyəti olan qurumlar, yəni nə Tarif Şurası, nə Nazirlər Kabineti, nə də Rəqəmsal Texnologiya Nazirliyi tərəfindən idarə edilmir. Bu səbəbdən, qiymətlərin artırılması şirkətin daxili qərarı hesab olunur, çünki dövlət polietilen torba istehsal etmir.

Xalid Kərimli qiymətlərə nəzarət mexanizmləri haqda da məlumat verib. Əgər istehsalçı müəssisə monopolistdirsə və ya razılaşdırılmış hərəkətlərlə Rəqabət Məcəlləsini pozursa, bu zaman İstehlak Bazarına Nəzarət və Antiinhisar Dövlət Agentliyi vəziyyəti yoxlaya bilər. Bu qurum vətəndaşların və dövlətin maraqlarını qorumaq üçün hərəkət edə bilər. Lakin əgər bazarda belə bir pozuntu aşkarlanmazsa, qiymətlərə müdaxilə etmək mümkün olmur. Bazar iqtisadiyyatı şəraitində təsərrüfat subyektləri öz məhsullarının qiymətini sərbəst şəkildə təyin edə bilirlər. Ekspert gələcəkdə polietilen torbaların qiymətinin yenidən artması ehtimalını istisna etmədiyini də əlavə edib.