Mançini Avropa nəhəngini çalışdıra bilər

Roberto Mançini “Mançester Yunayted” komandasının sükanı arxasına keçə bilər. İngiltərə nəhəngi hazırkı məşqçisi Ruben Amorimi işdən çıxarmaq qərarına gəlsə, İtaliyalı mütəxəssislə razılaşmağa çalışa bilər.

Xəbərlərə görə, Roberto Mançini yaxın dostlarına bu işin mümkünlüyü barədə danışıb. O, Amorimin komandadan uzaqlaşdırılması halında “Mançester Yunayted”i idarə etməyə hazır olduğunu bildirib. “The Sun” qəzetində yayımlanan məlumata görə, Mançini Amorimi əvəz edəcək namizədlər siyahısında yer alır.

Lakin klub rəhbərliyi hazırda Ruben Amorimə dəstək göstərir. Rəhbərliyin mövsümün sonuna qədər məhz Amorimlə işləməyə davam etmək niyyətində olduğu irəli sürülür. Bu mövqe Mançininin klubla müqavilə bağlama ehtimalını qısa müddətdə azalda bilər. Qeyd edək ki, Mançini İngiltərədə əvvəllər də çalışıb. O, “Mançester Yunayted”in əzəli rəqibi sayılan “Mançester Siti” klubuna rəhbərlik edib. Onun bu nəhəng kluba rəhbərlik etmək istəyi ingilis mətbuatında geniş müzakirə olunur.