Vətən müharibəsinin xronikası: 3 noyabr

2020-ci il sentyabrın 27-də Ermənistan silahlı qüvvələrinin cəbhə boyu törətdiyi genişmiqyaslı təxribatlara cavab olaraq Azərbaycan Ordusu "Dəmir yumruq" əks-hücum əməliyyatına başlamışdı. 44 gün davam edən Vətən müharibəsi təxminən otuzillik işğala son qoyulması və ərazi bütövlüyümüzün bərpası ilə yekunlaşdı. Müzəffər Ali Baş Komandan İlham Əliyevin rəhbərliyi altında qazanılmış bu möhtəşəm Zəfər tariximizə qızıl hərflərlə yazılıb. Noyabrın 3-ü müharibənin aktiv döyüş günlərindən biri kimi yadda qalıb. Həmin gün Prezident İlham Əliyev və Rusiya Prezidenti Vladimir Putin arasında telefon danışığı baş tutub. Eyni zamanda, cəbhənin Ağdərə, Xocavənd, Zəngilan və Qubadlı istiqamətlərində ağır döyüş əməliyyatları davam edirdi.

Azərbaycan Ordusu noyabrın 3-də cəbhənin əsas istiqamətlərində düşmənə ağır zərbələr endirdi. Döyüşlər nəticəsində düşmənin xeyli sayda canlı qüvvəsi sıradan çıxarıldı. Həmçinin dörd ədəd BM-21 "Qrad" yaylım atəşli reaktiv sistemi, bir ədəd KUB zenit-raket kompleksi, doqquz ədəd müxtəlif tipli topu və iki ədəd sursatla dolu yük maşını məhv edildi. Müdafiə Nazirliyi Ermənistan silahlı qüvvələrinin Xankəndi yaxınlığında yerləşən iki sursat anbarının məhv edilməsinin videogörüntüsünü yayıb. Cəbhədə uçuş keçirməyə cəhd göstərən Ermənistan Silahlı Qüvvələrinə məxsus taktiki pilotsuz uçuş aparatı da hava hücumundan müdafiə bölmələrimiz tərəfindən məhv edildi.

Taktiki əməliyyatlar çərçivəsində, cəbhənin Xocavənd istiqamətində gedən döyüşlərə cəlb edilən Ermənistan silahlı qüvvələrinin 2-ci motoatıcı alayının xeyli sayda şəxsi heyəti və döyüş texnikası məhv olundu. Cəbhənin Ağdərə, Ağdam və Xocavənd istiqamətində hücuma keçməyə cəhd edən düşmən ağır itkilərə məruz qaldı və geri çəkilməyə məcbur edildi. Azərbaycan Respublikasının Zəngilan rayonu istiqamətində Ermənistan ilə dövlət sərhədində düşmənin kəşfiyyat-diversiya qrupu zərərsizləşdirilib. Bundan əlavə, düşmənin snayper qrupu və əlahiddə zirehli tank taborunun komandiri də məhv edildi. Bu hərbi uğurlar Azərbaycan Ordusunun döyüş üstünlüyünü nümayiş etdirirdi.

Həmin dövrdə Ermənistanın mülki əhaliyə qarşı istifadə etdiyi qadağan olunmuş fosforlu top mərmiləri ANAMA tərəfindən partlayış yolu ilə zərərsizləşdirildi. Baş Prokurorluq sentyabrın 27-dən noyabrın 3-dək olan dövr ərzində Ermənistan silahlı qüvvələrinin yaşayış məntəqələrimizi ağır artilleriya və raket sistemlərindən atəşə tutması nəticəsində dəymiş zərərlə bağlı məlumat yaydı. Məlumatda bildirilirdi ki, 91 mülki şəxs həlak olmuş, 405 nəfər xəsarət almışdı. Ümumilikdə 2488 ev, 97 yaşayış binası və 461 mülki obyekt yararsız vəziyyətə düşmüşdü.