“Azerconnect Group” Azərbaycanda Kiberdiplomatiya Konfransına Dəstək Oldu
“Azerconnect Group” Azərbaycanda ilk dəfə keçirilən Kiberdiplomatiya üzrə Beynəlxalq Konfransı dəstəklədi. Bu tədbir, dövlət qurumlarının, biznes assosiasiyalarının, özəl sektorun, diplomatların və ekspertlərin bir araya gəldiyi mühüm bir platforma idi. Konfransda Azərbaycanın informasiya təhlükəsizliyini gücləndirmək üçün diplomatiyanın roluna diqqət çəkildi.
Konfrans, Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətinin təşkilatçılığı ilə, Azərbaycan Respublikası Prezidentinin Administrasiyası, Xarici İşlər Nazirliyi, Beynəlxalq Münasibətlərin Təhlili Mərkəzi, ADA Universitetinin tərəfdaşlığı, “Azerconnect Group” və digər özəl təşkilatların dəstəyi ilə baş tutdu.
Tədbirdə, qlobal kiberdiplomatiyada özəl sektorun rolu, kibertəhlükəsizlik sahəsinin inkişafında beynəlxalq əməkdaşlığın önəmi vurğulandı. Konfransda Avropa və Asiyanı birləşdirəcək “Rəqəmsal İpək Yolu” layihəsinin əhəmiyyəti də xüsusi vurğulandı. Bu strateji rəqəmsal dəhliz regionda iqtisadi inkişafı və rabitənin genişlənməsini sürətləndirmək potensialına malikdir.
Kiberdiplomatiya üzrə Beynəlxalq Konfransda, 30-dan çox ölkədən 120-yə yaxın nümayəndə, o cümlədən diplomatlar, nüfuzlu ekspertlər və rəsmi şəxslər iştirak etdilər.
“Azerconnect Group” haqqında
“Azerconnect Group”, Azərbaycanın sürətlə inkişaf edən İKT və yüksək texnologiyalar sahələrində fəaliyyət göstərir. Şirkət, mobil, internet, beynəlxalq kanalların təşkili, eləcə də FinTech, AdTech və Media/TV kimi rəqəmsal xidmətlər təklif edir. “Azerconnect Group”, müxtəlif ölkələrdə enerji, telekommunikasiya, yüksək texnologiyalar və tikinti sahələrində fəaliyyət göstərən “NEQSOL Holding” beynəlxalq şirkətlər qrupuna daxildir.
