Baş nazirin bağ evinin qapısına sərxoş sürücü çırpıldı

Böyük Britaniyada sərxoş sürücü, Baş nazirin rəsmi bağ evi "Çekers"in qapısına çırpılaraq 40 min funt sterlin dəyərində ziyan vurub.

Mattyu Vutton, Bakinqsəmşirədə yerləşən XVI əsrə aid "Çekers" sarayının baş qapısına qəsdən sürətlə yaxınlaşıb. Təhlükəsizlik kamerası görüntülərində Volkswagen Scirocco markalı avtomobilin 80 illik dəmir parmaklıqlara çırpılaraq onları havaya uçurduğu görünür.

Vutton daha sonra təhlükəsizlik dirəklərinə çırpılıb və zərər görmüş avtomobilin kapotundan tüstü çıxıb. 90-cı illərin ağ rəngli avtomobili, Baş nazirin rəsmi bağ evi kimi istifadə olunan mülkdə istifadəyə yararsız hala gəlib.

Hadisə yerində saxlanan Vuttonun avtomobilində çox sayda alkoqollu içki qutusu tapılıb. Aparılan testdə onun qanında alkoqolun icazə verilən səviyyənin üç qatı olduğu müəyyən edilib.

Redinq Regional Məhkəməsində təhlükəli avtomobil idarə etmə, əmlaka zərər vurma və alkoqollu içki qəbul etmiş halda avtomobil idarə etmə cinayətlərini qəbul edən Vutton 32 ay həbs cəzasına məhkum edilib və 40 ay müddətinə sürücülük hüququndan məhrum edilib.

Hadisə zamanı ağır yaralanan Vutton xəstəxanaya yerləşdirilib. Baş nazir Rişi Sunak hadisə zamanı sarayda olmayıb.

1921-ci ildən bəri Baş nazirlərin istifadə etdiyi birinci dərəcəli tarixi abidə statusuna malik "Çekers" ser Artur Li tərəfindən dövlətə bağışlanıb.

Polis, hadisə zamanı hər hansı bir zərər vurma niyyətinin olmadığını bildirib. İttihamçı Seliya Mardon, təhlükəsizlik kamerası görüntülərinin Vuttonun qəsdən sarayın qapısına doğru sürətlə irəlilədiyini göstərdiyini və yüksək alkoqol səviyyəsi ilə birlikdə bu dəlillərin təqsirlini cinayətini qəbul etməkdən başqa seçim qoymadığını söyləyib.