Böyük Britaniyada Sosial Xidmətlərin Nəzarətində Olan 2300-dən Çox Həssas Uşaq İtkin Düşüb

Böyük Britaniyada insan alverinə məruz qalmış və ya ölkəyə təkbaşına sığınacaq axtararaq gələn uşaqların itkin düşmə nisbətinin həyəcanverici dərəcədə yüksək olduğu aşkarlanıb. Mütəxəssislər xəbərdarlıq edirlər ki, bu uşaqlar yoxa çıxdıqdan sonra cinsi istismarın və cinayət şəbəkələrinin hədəfinə çevrilirlər. The Independent qəzeti və Missing People xeyriyyə təşkilatının həyata keçirdiyi “SafeCall” kampaniyası hər il itkin düşdüyü bildirilən təxminən 70 min uşağa pulsuz dəstək verməyi qarşısına məqsəd qoyub. Uşaq hüquqları təşkilatı ECPAT UK və Missing People tərəfindən yerli hökumətlərə edilən məlumat sorğuları nəticəsində əldə edilən göstəricilər bu vəziyyətin ciddiliyini ortaya qoyur.

Əldə olunan məlumatlara görə, 2024-cü ildə yerli hakimiyyət orqanlarının himayəsində olan, insan alverinə məruz qaldığı müəyyən edilən və ya bu cür şübhə doğuran 2,638 uşaqdan 864-ü yoxa çıxıb. Bu rəqəm, insan alveri qurbanı olan uşaqların təxminən yüzdə 37-sinin itkin düşməsi deməkdir. Eyni dövrdə sosial xidmətlərin məsuliyyətində olan 12,530 nəfər müşayiətçisiz uşaqdan isə 1,501-nin itkin düşdüyü bildirilib. Bu nisbət 13 faiz səviyyəsində olub və əvvəlki illə müqayisədə 2 bənd artım göstərib. Ümumilikdə, 2024-cü ildə sosial xidmətlərin qayğısında olan 2,300-dən çox uşağın aqibəti bilinmir.

Missing People təşkilatının Araşdırma Direktoru Ceyn Hunter, insan alverinə məruz qalan və müşayiətçisiz uşaqların “narahatlıq doğuran nisbətdə” itkin düşməsini vurğulayaraq, mövcud təhlükəsizlik mexanizmlərinin işləmədiyini göstərdiyini deyib. Hunter qeyd edib ki, hər uşaq təhlükəsiz mühitdə yaşamalıdır, lakin onların çoxu sistemin qoruması altında olmasına baxmayaraq müdafiə oluna bilmir. O, həmçinin yaşayış şəraitinin yaxşılaşdırılmasına və insan alveri qurbanlarını aşkar etmək üçün istifadə olunan Milli Müraciət Mexanizmi (NRM) haqqında ictimaiyyətin məlumatlandırılmasına çağırış edib. ECPAT UK-nin Siyasət Direktoru Laura Duran da vəziyyətə diqqət çəkərək, “Bu uşaqlar sadəcə bir statistika deyil. Onların çoxu ağır travmalar yaşayıb. İtkin düşdükdə yenidən istismar edilmə riski hədsiz dərəcədə yüksəkdir,” - deyə bildirib.

Hesabatda qeyd olunur ki, tətbiq edilən mövcud təcrübələr riskləri azaltmaq əvəzinə artırır. Uşaqların miqrasiya statusu ilə bağlı qeyri-müəyyənliklər və təhlükəsiz olmayan miqrasiya siyasətinin yaratdığı psixoloji təzyiq itkin düşmə riskini artıran amillər sırasındadır. Bundan başqa, bəzi yerli idarəetmə orqanlarının məlumat sorğularına cavab verməməsi səbəbindən, itkin düşən uşaqların həqiqi sayının rəsmi göstəricilərdən daha yüksək ola biləcəyi ehtimal edilir. Hökumətin sözçüsü isə mövcud vəziyyətlə bağlı açıqlamasında, indiki hakimiyyətin “ölkənin ən həssas uşaqlarının ehtiyaclarını qarşılaya bilməyən bir sistem miras aldığını” dilə gətirib. Sözçü, Uşaq Rifahı və Məktəblər Qanununun uşaq mühafizəsi sistemində son illərin ən böyük islahatını ehtiva etdiyini bildirərək, təhlükəsiz yaşayış şəraitinin yaradılması, qurumlar arasında məlumat mübadiləsinin inkişafı və hər bölgədə çoxsahəli mühafizə qruplarının qurulması kimi addımların atılacağını söyləyib.