Donald Tramp Ukraynanın Rusiya ərazisində uzun mənzilli raketlərdən istifadəsinə ABŞ-ın icazə verdiyi xəbərini YALANLADI

ABŞ Prezidenti Donald Tramp Ukraynanın Rusiya Federasiyası ərazisinin dərinliklərində uzun mənzilli raketlərdən istifadə etməsinə Birləşmiş Ştatların icazə verməsi barədə yayılan iddiaları qətiyyətlə rədd edib.

Donald Tramp bu açıqlamanı özünün sosial media hesabında verib. O, “Wall Street Journal” (WSJ) qəzetinin bu mövzu ilə bağlı hazırladığı xəbəri tamamilə təkzib edərək onu “yalan xəbər” adlandırıb.

Tramp qeyd edib ki, ABŞ-ın nə həmin raketlərlə, nə onların mənbəyi ilə, nə də Ukraynanın onlardan necə istifadə etməsi ilə bağlı heç bir əlaqəsi yoxdur. Bu bəyanatla Tramp, ABŞ-ın Ukraynaya Rusiya içərisində hədəflərə zərbə endirmək üçün hər hansı bir xüsusi razılıq verdiyi fikrindən tamamilə uzaqlaşdı.