İran, Əsədin istəyi ilə Suriyaya qoşun göndərə bilər

Suriyada müxaliflərin hücumları nəticəsində Əsəd rejimi ciddi çətinliklərlə üzləşib. Hələb, İdlib və Tel Rıfat kimi strateji əhəmiyyətli bölgələrin müxaliflər tərəfindən ələ keçirilməsi ilə Əsədin ümidi artıq müttəfiqlərinə bağlıdır.

İran: Əsəd istəsə, ordumuz köməyə gedəcək

Əsədə ən önəmli dəstəyi verən İrandan yeni açıqlama gəldi. İran Xarici İşlər Naziri Abbas Ərakçi Şamın tələbi halında İran ordusunun Suriyaya göndərilə biləcəyini bildirdi. Ərakçi həmçinin, vəziyyətin qiymətləndirilməsi üçün Moskvaya səfər edə biləcəyini, lakin bunun hələ təsdiq olunmadığını vurğuladı.

İlk dəstək İranlı milislərdən gəldi

Digər tərəfdən, Əsədə ilk dəstək İraqdakı İran tərəfdarı şiə milislərindən gəldi. Reuters agentliyinin verdiyi məlumata görə, bu milislər Suriyanın rejim ordusuna yardım etmək üçün ölkəyə daxil olublar.

İran Xarici İşlər Naziri Şamda Əsədlə görüşdü

Qeyd edək ki, İran Xarici İşlər Naziri Abbas Ərakçi son günlərdə Şamda Beşar Əsədlə görüşüb. Görüşdə İranın Suriyanın xalqına və ordusuna terrorla mübarizədə, regional təhlükəsizliyin və sabitliyin təmin olunmasında tam dəstək verdiyini bildirib. Əsəd, ABŞ-ın regionu xaosa sürükləmək planının bir parçası kimi baş verən hadisələrdən danışıb və “Keçmişdə olduğu kimi, Suriyanın bu dəfə də qalib gələcəyini” əlavə edib.