Montella türk futbolçuya sərt tənqid etdi: "Mənim üçün böyük məyusluqdur"

2026-cı il FİFA Dünya Kubokunun Avropa seçmə mərhələsinin E qrupunun dördüncü oyununda Kocaelidə Gürcüstanla qarşılaşacaq A Milli Futbol Komandasının baş məşqçisi Vinçenzo Montella mətbuat konfransında çıxış edib.

“OLMAMALI OLAN ŞEYLƏR”

Montella, qapıçı Berke Özerin yığma komandanın düşərgəsini tərk etməsi ilə bağlı bildirib ki, milli komandada ailə mühitinə böyük əhəmiyyət verir və bu mühitin pozulmasına icazə verməyəcək. O, fikirlərini belə davam etdirib: "Biz həmişə futbolçular arasındakı qrupda bir ailə mühitinin olduğunu söyləyirik və düşünürük ki, bu, hər kəs tərəfindən qəbul edilib. İnanılmaz bir ailə mühiti var və biz buna düşərgədə olmaq arzusu ilə nail oluruq. Futbolçular hər zaman milli komanda üçün mübarizə aparmalıdırlar. Biz komanda üçün hər şeyimizi ortaya qoymalıyıq. Mənim vəzifəm ən yaxşı futbolçuları seçməkdir. Bu seçimləri edərkən, oyundan oyuna müəyyən edilən strategiyalara görə ən yaxşı nədirsə, onu etməyə çalışırıq. Buna görə də, qərarlarımızı verərkən öz vəzifəmi yerinə yetirirəm və məsuliyyəti öz üzərimə götürürəm. Biz texniki qərarlar veririk. Belə hadisələr baş verdikdə, futbolçular da məsuliyyət götürməlidir; əgər biz buradayıqsa, məsuliyyətli insanlar kimi ölkəmizin şərəfini təmsil ediriksə, nə lazımdırsa, onu etməliyik. Bu dəfə oyundan əvvəl qapıçılarımızı müəyyən edərkən belə bir texniki seçim qərarı vermişdim. Lakin o, yaydığı açıqlama ilə texniki seçimə qarşı çıxdığını bildirmiş oldu. Biz burada ölkəmizi və onun şərəfini təmsil edirik. Geri qayıtdıqda heç kimə xəbər vermədən düşərgəni tərk etmək, çıxıb getmək yolverilməzdir. Bunu edirsinizsə, təəssüf ki, bunun nəticələri olur".

“MƏNİM ÜÇÜN ÇOX BÖYÜK MƏYUSLUQ”

"Bu mövzunu uzatmayacağam, çünki sabahkı oyun kimi daha vacib mövzularımız var, final kimi bir oyuna çıxacağıq" deyən Montella sözlərinə davam etdi: "Uzun müddətdir qatıla bilmədiyimiz Dünya Kuboku yolunda mübarizə aparırıq. Berkə ilk dəfə yığmaya dəvət göndərəndə, o, ikinci liqada 'Eyüpspor'da oynayırdı, ABŞ düşərgəsində iki oyun oynatdım. Hələ 'Lille'ə transferi olmamışdı, bəlkə də həmin çıxışları sayəsində belə bir addım atma fürsəti tapdı. Yaydığı açıqlamada o, sanki üstüörtülü şəkildə seçimimizin futbolçuların gəldiyi kluba əsaslandığını qeyd edib. Əgər belə olsaydı, Berke ABŞ düşərgəsində oynaya bilməzdi. Bu, mənim üçün çox böyük məyusluqdur. Elə bir məyusluq yaşadım ki... Biz kiməsə oynamaq zəmanəti verməyən bir qurumdan danışırıq. Bura milli komandadır, o anda kim ən yaxşıdırsa, o oynayır. O, Mert Günok ilə danışıb məsləhət ala bilərdi. Mert 2012-ci ildə ilk dəfə oynadıqdan sonra bir daha oynamaq üçün yeddi il gözləmək məcburiyyətində qaldı. Hal-hazırda oynamasa da, son dərəcə peşəkar bir yanaşması var, hər kəsi dəstəkləyir. Mən də eynisini gözləyirdim. Biz bu ailə mühitini qorumalıyıq. Mənə olan hörmətdən əvvəl, qrupa qarşı hörmətimiz çox vacibdir. Berkedən bir gözləntim var, çıxıb 'Mən bunları etdim' deməsini istərdim. Kim olursa olsun, qrupumuzun əmin-amanlığı və hörmət çox vacibdir."

“AĞLIMIZDAN ÇIXARMAMALIYIQ”

Sabah onları çətin bir rəqibin gözlədiyini vurğulayan Montella: "İnanılmaz dərəcədə inkişaf edən bir komanda ilə qarşılaşacağıq. Rəqibimizin müəyyən ssenariləri var, oyunun əvvəlindən, yoxsa son dəqiqələrində çətinlik yaradacaqlar. Biz fərqli ssenarilərə hazırlaşdıq. Nə qədər çətin bir rəqib olduğunu bilirik. Həvəsimiz, inancımızla Dünya Kuboku hədəfinə çatmaq istəyirik. Qrupda hər oyun çətindir, son oyunun ilk yarısında da çətinlik çəkmişdik. Qol fərqini də sıfırladıq, bu bizim üçün çox vacib idi. Sabah əlimizdən gələni edərək istədiyimiz nəticəni qazanmaq istəyirik. Nə qədər çətin bir rəqib olduğunu ağlımızdan çıxarmayacağıq" deyə fikirlərini yekunlaşdırıb.

“GÜNAHSIZ İNSANLARIN ÖLÜMÜNÜ İZLƏMƏK MƏCBURİYYƏTİNDƏYİK”

Sabahkı oyunun tribunalardan əldə olunan gəlirinin TFF tərəfindən Fələstinə bağışlanacağını xatırladan Montella, "İnsanlıq naminə görülən hər şey təqdirəlayiqdir. Elə bir dövrdə yaşayırıq ki, günahsız insanların ölümünü izləmək məcburiyyətindəyik. Buna görə də, edə biləcəyimiz hər şeyi etməliyik" deyib.

İtalyan baş məşqçi Kocaeli azarkeşlərinə də mesaj göndərərək: "Adətən bütün oyunları izləyirik, lakin keçən həftə burada bir oyunu seyr etdim və atmosferin nə qədər isti olacağını təsəvvür edirəm. Sabahkı oyunu səbirsizliklə gözləyirik. Ümid edirəm ki, gələcəkdə burada daha çox oyunumuz olacaq. Sabah iki futbolçumuz üçün çox özəl bir gecə olacaq" deyə əlavə edib.