Səlahəddin Dəmirtaşdan Bahçəliyə və Özgür Özələ Təşəkkür - PKK-ya Silahsızlanma Mesajı

Uzun müddətdir həbsdə olan keçmiş HDP həmsədri Səlahəddin Dəmirtaş, azadlığa buraxılması çağırışlarının ardınca ilk rəsmi açıqlamasını yayımlayıb. Sosial media üzərindən etdiyi yazılı bəyanatda Dəmirtaş, hər kəsin təəccübünə səbəb olan bir addım ataraq MHP sədri Dövlət Bahçəliyə və CHP sədri Özgür Özələ xüsusi təşəkkürlərini çatdırıb. O, bu iki siyasi liderin tutduğu mövqeni yüksək qiymətləndirib. Dəmirtaş qeyd edib ki, cənab Dövlət Bahçəli bugünkü qrup toplantısında cəsarətlə tabu hesab edilən fikirləri qırıb. O, bununla da göstərib ki, qorxulara təslim olmaqla sülh qurmaq olmaz. Bu addımına görə Bahçəlini səmimi qəlbdən təbrik edir və ona təşəkkür edirəm.

Dəmirtaş öz açıqlamasında CHP sədri Özgür Özəli də unutmayıb. O, bildirib ki, Özəl də öz növbəsində nəcib bir mövqe tutaraq, özünə tənqidi yanaşmaqla fərqli bir cəsarət nümunəsi sərgiləyib. Keçmiş HDP həmsədri hər iki lideri səmimi qəlbdən təbrik etdiyini və minnətdar olduğunu vurğulayıb. Dəmirtaş siyasi müstəvidə yeni bir dövrün başlanmasının vacibliyini qeyd edib. O, hər kəsin əmin olmasını istəyib ki, əgər birlikdə yeni bir səhifə açmağa çalışarkən keçmişdəki səhvlərə ilişib qalsaq, gələcəyimizi girov altına qoymuş olarıq.

Dəmirtaş əlavə edib ki, nə onun, nə də başqa bir siyasətçinin bu cür lüksü yoxdur. Xalq onlardan problemlərin həllini gözləyir. Odur ki, uzaqgörənlik və siyasi cəsarətlə yeni fikirlər söyləmək və yeni bir nizam qurmaq hamımızın birbaşa borcudur. O, bu çərçivədə kiməsə xüsusi bir incikliyi və ya küskünlüyü olmadığını da bildirib. Məktubunun son hissəsində isə Dəmirtaşın diqqəti birbaşa PKK-ya yönəlib və sülh prosesi ilə bağlı şərtlər irəli sürülüb.

O, silahların aradan çıxarılması məsələsində kəskin və qəti mövqe nümayiş etdirib. Dəmirtaş qeyd edib: "Əvvəlcə silahlar tamamilə və qalıcı olaraq aradan qaldırılacaq, bu, birmənalıdır." O, bu məsələdə Əbdullah Öcalanın da mövqeyinin dəqiq və qətiyyətli olduğunu, eyni zamanda ölkə Cümhurbaşqanının da prosesin arxasında durduğunu xatırladıb. Dəmirtaşın sözlərinə görə, onlara düşən vəzifə bu prosesin uğuruna tərəddüdsüz dəstək verməkdir. Qalan bütün problemləri demokratik siyasətin imkanları daxilində birlikdə həll etməyə çalışacaqlarını bildirən Dəmirtaş, əsas çağırışını təkrarlayıb: "Lakin əvvəlcə sülh, əvvəlcə sülh."