Fiat Şirkətinin Üç Təkərli Mini Elektrik Yük Maşını!

İtalyan avtomobil istehsalçısı Fiat, şəhər və qısa məsafəli yük daşımaları üçün hazırlanmış yeni elektrikli mini yük maşınını təqdim edib. Tris adlı model, üç təkərli quruluşu və kompakt ölçüləri ilə diqqət çəkir. Kiçik müəssisələr, paylama xidmətləri və dar ərazilərdə manevr etmək istəyən istifadəçilər üçün nəzərdə tutulan bu elektrikli vasitə, üç fərqli kasa variantı ilə təklif olunur: şassi kabin, açıq kasa və bağlı kasa.

Cəmi 3.17 metr uzunluğunda olan, olduqca kompakt bu yük maşınının yük həcmi 685 litr, daşıma qabiliyyəti isə 550 kiloqramdır. Yük sahəsi asanlıqla bir Euro paletə yer vermək üçün dizayn edilib. 48 voltluq elektrik mühərriki ilə işləyən maşın, arxa təkərlərə qoşulmuş mühərrik vasitəsilə 12 at gücü (9 kVt) istehsal edir və Trisi saatda 45 kilometr sürətə qədər sürətləndirə bilir.

Enerji tələbatı 6.9 kVt saatlıq batareya paketi ilə ödənilir. Bu batareya tam şarjla 90 kilometrə qədər məsafə qət etməyə imkan verir. Adi ev tipi prizlə şarj oluna bilən Tris, 0%-dən 80%-ə 3 saat 30 dəqiqədə, tam şarjı isə 4 saat 40 dəqiqədə əldə edir. Fiat Trisin ilk olaraq Afrika və Yaxın Şərq bazarlarında satışa çıxarılacağı bildirilib. Avropa bazarı üçün dəqiq bir tarix təyin olunmasa da, gələcəkdə bu bölgədəki istifadəçilərlə görüşmək planlaşdırılır.