Lamborghini-nin Ən Güclü Superkarı - Fenomeno

Monterey Avtomobil Həftəsində təqdim olunan Lamborghini Fenomeno, dünyanın ən sürətli avtomobillərindən biri kimi tanıdılıb. Bu məhdud buraxılış seriyalı superkar, şirkətin tarixindəki ən güclü maşındır.

Cəmi 29 ədəd istehsal olunacaq Fenomeno, 3.5 milyon dollar dəyərindədir və Lamborghini-nin öz kolleksiyasına da bir ədəd əlavə olunacaq. Hibrid sistemə sahib olan bu canavar, 6.5 litrlik V12 mühərrikinin 823 at gücü və üç elektrik mühərrikinin əlavə 242 at gücü ilə ümumilikdə 1065 at gücünə malikdir. Bu, son buraxılış olan Revuelto-dan da çoxdur.

0-dan 100 km/saat sürətə 2.4 saniyədə çatan Fenomeno, maksimum 350 km/saat sürət inkişaf etdirir. Hər at gücü üçün cəmi 1.64 kq çəki düşür ki, bu da digər modellərdən daha yaxşı göstəricidir. 725 Nm maksimal fırlanma momenti isə Revuelto ilə eynidir. Yeni, 7 kWh tutumlu batareya sistemi, təxminən 20 km məsafəni tək elektrik enerjisi ilə qət etməyə imkan verir.

Tamamilə karbon lif şassisi və gövdəsi, karbon-keramik disk əyləcləri, ön 21 və arxa 22 düymlük Bridgestone Potenza Sport təkərləri ilə təchiz olunmuş Fenomeno, dizaynında Huracán GT3 yarış avtomobilinin iri hava girişlərindən və Essenza SCV12-nin uzun quyruğundan ilham alıb. Adını isə, 2002-ci ildə Meksikada keçirilən bir koridada özünəməxsusluğu ilə diqqət çəkən bir öküzə görə alıb. "Fenomeno" sözü italyan və ispan dillərində "qeyri-adi, unikal" mənasını verir.

Məhdud sayda istehsal olunmasına baxmayaraq, Lamborghini-nin gələcək dizaynlarına istiqamət verən bir model olaraq qəbul edilən Fenomeno, tam elektrikli Lamborghini modellərinin gələcəyini isə qaranlıqda saxlayır. 2021-ci ildə elan olunan plana əsasən, bütün modellərin hibrid versiyaları buraxılmalı, ardından 2030-cu ilə qədər ilk tam elektrikli Lamborghini təqdim olunmalıdır.