Microsoft 6000 İşçini İşdən Azad Edəcək

Dünyanın nəhəng texnologiya şirkətlərindən biri olan Microsoft, 6000-dən çox əməkdaşının işinə son qoyacağını açıqladı. Şirkət rəhbərliyinin bildirdiyinə görə, bu addım struktur dəyişiklikləri çərçivəsində atılır və son illərin ən böyük ixtisar dalğasıdır. Bu, 228.000 nəfərdən ibarət işçi heyətinə ciddi təsir edəcək.

İxtisarların müəyyən şöbələr ilə məhdudlaşmayacağı, beynəlxalq ofislərdə, o cümlədən LinkedIn-də bir çox mühüm vəzifəni əhatə edəcəyi bildirilir. Şirkət açıqlamasında bu dəyişikliyin “dinamik bazarda uğur qazanmaq üçün zəruri” olduğunu vurğuladı. Maliyyə direktoru Amy Hoodun son həftələrdəki çıxışlarında idarəetmə strukturunun sadələşdiriləcəyi barədə işarələr verildiyi də xatırlanır. Hood daha çevik və yüksək performanslı komandaların yaradılmasını hədəflədiklərini, bunun üçün də rəhbər sayının azaldılacağını bildirdi.

Qeyd edək ki, bu ixtisarlar Microsoft-un 2025-ci ildə həyata keçirdiyi müxtəlif işçi azaldılma tədbirlərinin davamıdır. İl ərzində yüzlərlə işçi iş performansına görə işdən çıxarılmışdı. Bundan əvvəl isə 2024-cü ildə Activision Blizzard və Xbox şöbələrindən 1900, HoloLens və Azure komandalarından isə təxminən 1000 işçi işsiz qalmışdı. Texnologiya nəhəngləri arasında yenidənqurma prosesi davam edərkən, Microsoft-un bu qərarı, xüsusilə süni intellekt və bulud hesablama sahəsində xərclərin tarazlaşdırılması üçün atılan bir addım kimi dəyərləndirilir.