Microsoft Minlərlə İşçisini İşdən Azad Edəcək

Microsoft, süni intellektə yatırımlarını artırmaqla texnologiya sahəsində liderliyini möhkəmləndirmək üçün xərcləri azaltmaq məqsədilə yeni bir işçi azaldılması dalğasına hazırlaşır. Son məlumatlara görə, iyulun əvvəlində minlərlə işçi işdən azad ediləcək. Xüsusilə satış komandaları bu yeni azaldılmanın əsas hədəfi kimi önə çıxır.

Qeyd edək ki, qərar Microsoft-un maliyyə ilinin sonuna təsadüf edir. Hər il bu dövrdə təşkilati dəyişikliklər və yenidən quruluşla bağlı müxtəlif qərarlar qəbul edilir. Lakin Microsoft hələlik mövzu ilə bağlı rəsmi açıqlama verməyib.

Bu inkişaf, Microsoft-un may ayında 6000 nəfərin işdən azad edilməsi dalğasından sonra gəlir. Həmin dövrdəki azaldılmalar əsasən məhsul inkişafı və mühəndislik komandalarını hədəf almışdı. Satış və marketinq kimi müştərilərlə birbaşa əlaqə quran vəzifələr böyük ölçüdə qorunmuşdu. Lakin bu tarazlıq yeni dalğada dəyişir. Satış şöbəsi ixtisarın mərkəzindədir.

Aprel ayında şirkət əməkdaşlarına kiçik və orta ölçülü müəssisələrə yönəlmiş proqram təminatı satışlarının bir hissəsini xarici şirkətlərə ötürməyi planlaşdırdığını bildirmişdi. Bu addım şirkətin daxili quruluşunu sadələşdirmək səylərinin bir hissəsi hesab olunur.

Microsoft-un dünyada təxminən 228 min əməkdaşı var. Bu sayın təxminən 45 mini satış və marketinq şöbələrində çalışır. İşdən azad edilmələrin xüsusilə bu seqmentdə cəmləşəcəyi gözlənilir. Beləliklə, Microsoft süni intellekt sahəsində böyüməyə davam etməyi və bu böyümənin gətirdiyi əməliyyat yükünü azaltmağı hədəfləyir.