Sony Tarixində İlk: Yeni İdarə Heyəti

Sony Korporasiyası 80 illik tarixində əsaslı idarəçilik dəyişikliyinə gedərək, həm şirkətin, həm də PlayStation bölməsinin başına yeni adlar təyin etdi. Verilən açıqlamaya görə, 1 aprel 2025-ci ildən etibarən Hiroki Totoki Sony-nin yeni baş direktoru olacaq. Bu qərar, indiki baş direktor Kenichiro Yoshidanın rəhbərliyi tərk etməsindən sonra qəbul edilib. Yoshida isə şirkətin direktorlar şurasının sədri vəzifəsini davam etdirəcək.

PlayStation-ın yeni lideri: Hideaki Nishino Sony-nin ən böyük bölmələrindən biri olan PlayStation da əhəmiyyətli dəyişikliklərə məruz qalıb. Jim Ryanın istefasından sonra PlayStation iki hissəyə bölünsə də - Platform Əməliyyat Qrupu və Studio Əməliyyat Qrupu – indi bütün PlayStation-ı Hideaki Nishino idarə edəcək. Bu dəyişikliklə Nishino, PlayStation aparat və proqram təminatı ekosisteminə cavabdeh olacaq, oyun studiyaları və məzmun idarəçiliyi isə Hermen Hulstə həvalə olunacaq.

Hermen Hulst PlayStation oyunlarının inkişafı və nəşri, həmçinin PlayStation Productions vasitəsilə oyunların serial və film adaptasiyalarını da həyata keçirəcək. Sony bu addımla həm oyun sektorunda rəqabəti gücləndirməyi, həm də oyunlarını müxtəlif media platformalarına çıxarmağı hədəfləyir.

İdarəçilik dəyişiklikləri yalnız PlayStation ilə məhdudlaşmır. Sony-nin yeni maliyyə direktoru (CFO) Lin Tao olub ki, bu, şirkətin 80 illik tarixində ilk qadın CFO-dur. 110.000-dən çox işçisi olan nəhəng bir şirkət olan Sony üçün bu təyinatlar şirkətin gələcək strategiyası üçün böyük əhəmiyyət daşıyır.

Son illərdə Sony kamera, televiziya, PlayStation və əyləncə sənayesinə fokuslanaraq yüksək mənfəət marjası olan məhsullara üstünlük verib. Yeni idarə heyəti ilə bu strategiyanın necə inkişaf edəcəyi maraq doğurur. Bundan əlavə, Honda ilə birgə hazırlanan Afeela elektrik avtomobilinə PlayStation 5-in inteqrasiyası şirkətin oyun sənayesini müxtəlif sahələrə inteqrasiya etməyə çalışdığını göstərir.

Bu dəyişikliklərin Sony və PlayStation üçün yeni bir dövrün başlanğıcı olacağını düşünürsünüzmü?