Volkswagen Touareg və ID.5 istehsalı dayandırılır

Volkswagen avtomobil konsernində ciddi dəyişikliklər baş verir. Şirkət 24 ildir lüks SUV seqmentində əsas oyunçu olan Touareg modelinin istehsalını dayandırmağa hazırlaşır. Touareg ilə yanaşı, ID.5 elektrikli kupe-SUV-nin istehsalı da dayandırılacaq. Bu qərar, Volkswagenin daha əlçatan elektrikli avtomobillərə keçid strategiyasının bir hissəsidir.

2002-ci ildə satışa çıxarılan Touareg, Porsche Cayenne ilə eyni platformada hazırlanmış və əvvəldən premium SUV seqmentində yer alıb. Yüksək keçiriciliyi, güclü mühərrik variantları və lüks avadanlıqları ilə Touareg, şirkətin SUV hücumunun simvolu halına gəlmişdi. Şirkət daxili mənbələrə görə, Touaregin istehsalı 2026-cı ildə başa çatacaq. Volkswagen Tiguan və Golf kimi modellər üçün varis planları olsa da, Touareg üçün birbaşa varis planlaşdırılmır.

Touareg şirkətin dayandıracağı yeganə model deyil. 2021-ci ildə satışa çıxarılan elektrikli ID.5-in istehsalı da 2027-ci ilədək dayandırılacaq. ID.4-ün kupe versiyası olaraq satışa çıxarılan model gözləntiləri doğrultmayıb. Oxşar texniki xüsusiyyətlərə sahib olmasına baxmayaraq, ID.4 daha geniş auditoriyaya çataraq, ID.5-i kölgədə qoyub.

Bu qərarlar Volkswagenin məhsul strategiyasında dəyişikliyi əks etdirir. Şirkət elektrikli avtomobil bazarında daha geniş auditoriyaya çatmaq üçün giriş səviyyəli modellərə diqqət yetirir. ID.2 (ehtimal ki, ID.Polo adlandırılacaq) 2026-cı ildə satışa çıxarılacaq. Ardıcıl olaraq bir SUV modeli də planlaşdırılır. Daha kiçik və iqtisadi model olan ID.1-in istehsal versiyası 2027-ci il üçün planlaşdırılır. Volkswagen, hazırkı Touran modelinin yerini tuta biləcək elektrikli MPV üzərində də işləyir. "Mini Buzz" adı verilən bu konsepsiya hələ təsdiqlənməsə də, şirkət daxilində qiymətləndirmə prosesi davam edir. Şirkət rəhbərlərinə yaxın mənbələr bildirir ki, bu modelin prioriteti geridə qalıb, çünki Skoda oxşar bir avtomobilin inkişafı prosesindədir.

Volkswagen 2025-ci ilin ilk yarısında Almaniyada səkkiz model ilə elektrikli avtomobil satışında ilk 10-luq arasında yer alsa da, qlobal səviyyədə oxşar müvəffəqiyyəti qoruyub saxlaya bilməyib. Şirkət daha əlçatan və istifadəçi dostu elektrikli modellərlə bazar mövqeyini gücləndirməyi hədəfləyir. Touareg və ID.5-in istehsalının dayandırılması bu transformasiya prosesindəki ən görünən addımlardan biridir.