WhatsApp 2025-ci ildə Rusiyada bloklana bilər

Rusiya hökuməti 2025-ci ildə məşhur mesajlaşma proqramı WhatsApp-ı bloklamağı planlaşdırır. Senator Artem Şeykin, RIA Novosti agentliyinə verdiyi açıqlamada, əgər platforma istifadəçi məlumatlarını Rusiya təhlükəsizlik xidmətləri ilə paylaşmaqdan imtina edərsə, bloklamanın ehtimalının artacağını bildirib. Şeykinin sözlərinə görə, "xarici şirkətlər Rusiya qanunlarına əməl etməlidirlər, əks halda fəaliyyətlərini davam etdirmələri mümkün olmayacaq".

Duma üzvü Oleg Matveyçev isə WhatsApp-ın terrorçu və ekstremist qruplar tərəfindən istifadə olunduğunu iddia edib. Matveyçev, platformanın Rusiya təhlükəsizlik orqanları ilə əməkdaşlıqdan imtina etdiyini vurğulayaraq, "Rusiya hakimiyyəti WhatsApp-ın əməkdaşlığa açıq olub-olmadığını görəcək. Top indi onların meydançasındadır" deyib.

Dekabrın 19-da Rusiyanın media tənzimləyicisi Roskomnadzor, WhatsApp və Skype-ı istifadəçi məlumatlarını Rusiyada saxlamağı və təhlükəsizlik orqanlarına təqdim etməyi öhdəsinə götürən qeydiyyata əlavə edib. Lakin, WhatsApp rəhbərliyi bu qaydalara hələlik əməl etmək üçün heç bir addım atmayıb. Bu, Rusiyanın əvvəllər terrorizm əleyhinə qanunları pozduğuna görə Viber mesajlaşma proqramını bloklamağından sonra baş verib.

Ukrayna müharibəsinin ilk günlərindən etibarən Facebook, Instagram və X (əvvəlki Twitter) kimi sosial media platformaları Rusiyada VPN olmadan əlçatmaz hala gəlib. Həmçinin, Rusiyanın məşhur mesajlaşma tətbiqlərində beynəlxalq zəngləri tamamilə qadağan etmək və ya xarici istifadəçilərdən gələn zəngləri bloklamaq kimi yeni addımlar üzərində işlədiyi barədə şayiələr yayılır. Kommersant qəzetinin verdiyi məlumata görə, bu qərar fırıldaqçı zənglərin artması səbəbindən gündəmə gəlib və bu zənglərin təxminən 70 faizinin xaricdən edildiyi bildirilib.

Bütün bunlar Rusiyalı istifadəçilərlə WhatsApp arasındakı münasibətlərə necə təsir edəcək, sualını ortaya qoyur.