Xiaomi öz istehsalı Xring prosessorunu təqdim edəcək!

May ayının sonlarında Xiaomi şirkətinin tamamilə özünün hazırladığı yeni nəsil mobil prosessoru – Xringin təqdimatı gözlənilir. Keçmiş Qualcomm rəhbəri Qin Muyun başçılıq etdiyi bu layihə, Xiaomi-nin mobil bazarındakı müstəqilliyini gücləndirməyə xidmət edir. Xring, Qualcomm və MediaTek kimi nəhənglərlə birbaşa rəqabət aparmaq üçün hazırlanır.

İstehsal prosesi üçün 3nm texnologiyası əvəzinə TSMC-nin 4nm N4P texnologiyası seçilib. Bu qərarla Xiaomi, keçmişdə Huawei-nin yaşadığı sanksiyalardan qaçmaq istəyir. Texniki xüsusiyyətlərə gəldikdə isə, Xring səkkiz nüvəli quruluşa malikdir. Əsas performans nüvəsi 3.2 GHz tezlikdə çalışan Cortex-X925-dir. Ona üç ədəd 2.6 GHz Cortex-A725 və dörd ədəd 2.0 GHz Cortex-A520 nüvələri əlavə olunub. Qrafik prosessoru kimi isə 1.3 GHz tezlikdə çalışan Imagination IMG DXT72 GPU istifadə olunub.

Bu cür güclü aparat təchizatı sayəsində Xringin performans səviyyəsinin Snapdragon 8 Gen 2 prosessoruna yaxın olacağı bildirilir. Xiaomi bu addımla Qualcomm və MediaTek kimi üçüncü tərəf istehsalçılarından asılılığını azaltmaqla qlobal bazarda lider olmağı hədəfləyir. Yeni prosessor haqqında ətraflı məlumat may ayında keçiriləcək təqdimatda paylaşılması gözlənilir.