Azərbaycanda mobil cihazlarda "Android"in payı son beş ayda 11 %-dən çox azalıb

Noyabr ayında Azərbaycanda mobil cihazlar bazarında "Android" əməliyyat sisteminin payı ardıcıl beşinci aydır ki, azalır. "Statcounter" agentliyinin son hesabatına istinadən verilən məlumata görə, noyabrda "Android"in bazar payı 77,84 % təşkil edib. Bu davamlı azalma ümumilikdə 11,2 %-ə çatıb.

Həm aylıq, həm də illik müqayisələr sistemin mövqeyinin zəiflədiyini göstərir. Oktyabr ayına nisbətən "Android"in payı 0,49 faiz bəndi azalıb. Daha geniş perspektivdə, bir il əvvəlki göstərici ilə müqayisə ediləndə, azalma 4,78 faiz bəndi təşkil edir. Bu rəqəmlər göstərir ki, "Android"in bazardakı dominantlığı tədricən geriləyir.

Mobil cihazlar sektorunda "Android"in azalması fonunda, "İOS" əməliyyat sistemi əks istiqamətdə hərəkət edərək bazar payını artırıb. Noyabr ayında "İOS"un payı 21,65 % olub. Bu, aylıq müqayisədə 0,45 faiz bəndi artım deməkdir. İllik müqayisədə isə "İOS" payını 4,84 faiz bəndi artırıb. Bu artım "Android"in illik itkilərini demək olar ki, tamamilə kompensasiya edir.

Planşet seqmentində isə vəziyyət daha mürəkkəbdir. Planşetlərdə "Android"in bazar payı 77,23 % təşkil edib. Aylıq müqayisədə bu göstərici 6,87 faiz bəndi artmış olsa da, illik müqayisədə 13,63 faiz bəndi ciddi şəkildə azalıb. Eyni zamanda, planşetlərdə "İOS"un bazar payı 22,72 %-ə çatıb. Bu sistemin payı aylıq müqayisədə 6,84 faiz bəndi azalma göstərir, lakin illik müqayisədə 13,62 faiz bəndi çoxdur. Bu rəqəmlər planşet bazarında hər iki sistemin mövqeyinin tez-tez dəyişdiyini göstərir.