Cinayət yolu ilə əldə edilmiş əmlakı leqallaşdırmaqda təqsirləndirilən sahibkarlara hökm oxunub

Cinayət yolu ilə əldə edilmiş əmlakı leqallaşdırmaqda təqsirləndirilən iş adamları Emil Qulubəyov və Nəriman Laziminin işi üzrə məhkəmənin yekun iclası keçirilib. Bakı Ağır Cinayətlər Məhkəməsində hakim Telman Hüseynovun sədrliyi ilə görülən prosesdə dövlət ittihamçısı çıxış etdi. O, əvvəlcə hər iki təqsirləndirilən şəxsə 8 il azadlıqdan məhrumetmə cəzası istəmişdi, müdafiə tərəfi isə müvəkkillərinə tam bəraət verilməsini xahiş etmişdi.

Müşavirədən sonra hökm elan olundu. Məhkəmənin qərarına görə, təqsirləndirilən hər iki şəxs barəsində irəli sürülən əsas ittihamlardan biri - Cinayət Məcəlləsinin 193-1.2.3-cü maddəsi (cinayət yolu ilə əldə edilmiş əmlakı leqallaşdırma, qulluq mövqeyindən istifadə etməklə törədildikdə) sübuta yetirilmədiyi üçün onlara bəraət verilib. Bununla belə, sahibkarlar Cinayət Məcəlləsinin digər maddəsi (179.2.3 - mənimsəmə və ya israf etmə) ilə təqsirli bilindilər. Bu maddə ilə Emil Qulubəyov 3 il 5 ay, Nəriman Lazimi isə 7 il müddətinə azadlıqdan məhrum edildilər. İttihama görə, təqsirləndirilən şəxslər ümumilikdə 300-ə yaxın formal şirkət təsis edərək fərqli maliyyə əməliyyatları həyata keçirmişdilər.

Məhkəmə prosesi zamanı şirkətlərin fəaliyyəti və nizamnamə kapitalı diqqət çəkdi. Emil Qulubəyov “Spektr-R” MMC-yə rəhbərlik edirdi; bu şirkət 5 may 2017-ci ildə qeydiyyata alınmışdı, nizamnamə kapitalı isə cəmi 2 manat göstərilmişdi. Nəriman Lazimi isə “Kondor TS” MMC-nin rəhbəri idi. Onun şirkəti 24 aprel 2010-cu ildə qeydiyyata alınıb və nizamnamə kapitalı 10 manat təşkil edib. İş üzrə zərərçəkmiş şəxs qismində Maliyyə Nazirliyi tanındı.