"Deloitte": "Azərbaycanda biznes mühitində sektor müxtəlifliyi baxımından müsbət dinamika müşahidə olunur"

Azərbaycanda biznes mühiti tədricən genişlənir, gəlir səviyyəsi və sektor müxtəlifliyi baxımından müsbət dinamika müşahidə edilir. Bu məlumatlar "Deloitte" şirkətinin "Azərbaycanda biznes perspektivləri" adlı makroiqtisadi hesabatının doqquzuncu buraxılışındakı "Biznes etimadı sorğusu"nda qeyd edilib. Hesabatın nəticələri ölkədə iqtisadi aktivliyin artdığını və şirkətlərin strukturunda maraqlı tendensiyaları ortaya qoyur. Xüsusilə, 2024-cü ildə keçirilmiş sorğu göstərir ki, iştirak edən sahələrin əhatə dairəsi daha da genişlənib.

Sorğuda iştirak edən şirkətlərin ən böyük hissəsi, yəni 28 %-i bank və maliyyə xidmətləri sektorunda fəaliyyət göstərir. Onları ticarət, nəqliyyat və logistika sahələrində çalışan şirkətlər izləyir; bu qrupların hər biri ümumi iştirakın 15 %-ni təşkil edir. Əvvəlki illərlə müqayisədə, 2024-cü ildə biznes sektorları arasında daha balanslı təmsilçilik yaranıb. Əgər əvvəllər iştirakçılar əsasən maliyyə və enerji sektorlarına aid idilərsə, bu dəfə texnologiya, tikinti və kənd təsərrüfatı sahələrindən də iştirak payı artıb. Tikinti 8 %, kənd təsərrüfatı 3 %, mədən və metallurgiya sahələri 3 % paya malikdir, digər sənaye sahələri isə 10 % təşkil edir.

Şirkətlərin maliyyə göstəricilərinə baxsaq, respondentlərin 38 %-i illik gəlirinin 5 milyon manatdan az olduğunu bildirib. 10-100 milyon manat və 100-500 milyon manat gəlir diapazonunda olan şirkətlərin hər biri 15 % təşkil edib. Müqayisə üçün demək lazımdır ki, 2023-cü ildə illik gəliri 5 milyon manatdan az olan şirkətlərin payı 44 % idi. Bu azalma bəzi şirkətlərin gəlir strukturunda artım olduğunu göstərir. Yüksək gəlir əldə edən qrup- 500 milyon-1 milyard manat və 1 milyard manatdan çox illik gəliri olan şirkətlər- isə iştirakçıların 10 %-ni təşkil edib. Ümumilikdə, Deloitte sorğusu Azərbaycan iqtisadiyyatında iqtisadi fəallığın və sektor müxtəlifliyinin genişlənməkdə olduğunu göstərir.