Gömrükdə sutkada 685 ton yük emal olunur - DGK nümayəndəsi

Hava Nəqliyyatında Baş Gömrük İdarəsinin Logistika Mərkəzi Gömrük postu ölkəyə idxal, ixrac və tranzit daşınan yüklərin gömrük rəsmiləşdirilməsi ilə məşğuldur. Logistika Mərkəzi Gömrük postunun rəisi Rövşən Mahmudzadə bu barədə mərkəzə təşkil edilən mediatur çərçivəsində jurnalistlərə məlumat verib. O qeyd edib ki, mərkəz ölkə ərazisinə gələn və gedən, həmçinin tranzit və transfer edilən yüklərə tam gömrük nəzarətini təmin edir.

Bu mərkəzdə sutka ərzində böyük həcmdə yük emal edilir. R. Mahmudzadənin sözlərinə görə, Logistika Mərkəzi Gömrük postunda gündəlik orta hesabla 80 ton idxal, 5 ton ixrac və 600 ton tranzit-transfer yükü rəsmiləşdirilmədən keçir. Bu, sutkalıq cəmi 685 ton yük deməkdir. Gömrük rəsmiləşdirilməsi işləri Avtomatlaşdırılmış Risk Analiz Sistemi (ARAS) vasitəsilə aparılır. ARAS sistemi hansı yüklərin yoxlanışa cəlb olunacağını xüsusi göstəricilər əsasında müəyyən edir.

Yoxlamalar zamanı mütəxəssislər yüklərin qanunvericiliyə uyğunluğunu araşdırırlar. Yüklərin uyğunluğu təsdiqlənəndən sonra onların ölkəyə buraxılmasına icazə verilir. Əksinə, pozuntu halları aşkarlananda müvafiq tədbirlər görülür. Daşınan yüklər əsasən hava daşıyıcıları vasitəsilə gətirilir. Tranzit və ticarət yüklərinin əsas istiqamətləri ABŞ, Avropa ölkələri və Birləşmiş Ərəb Əmirlikləridir.