“İlham Əliyev: Müharibənin qalibi, sülhün müəllifi” kitabının təqdimatı keçirilib (FOTO)

26 noyabr 2025-ci il tarixində Respublika Veteranlar Təşkilatında "İlham Əliyev: Müharibənin qalibi, sülhün müəllifi" adlı kitabın təqdimatı keçirilib. Bu əsərin müəllifi Azərbaycan Respublikası Müharibə, Əmək və Silahlı Qüvvələr Veteranları Təşkilatı İctimai Birliyinin sədri, polkovnik Cəlil Xəlilovdur. Polkovnik Xəlilov eyni zamanda siyasi elmlər üzrə fəlsəfə doktoru və Prezident yanında Dövlət İdarəçilik Akademiyasının dosentidir. Tədbir başlamazdan əvvəl Azərbaycan Respublikasının Dövlət Himni səsləndirildi.

Dövlətin müstəqilliyi və ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad edildi. Azərbaycan Yazıçılar Birliyinin İdarə Heyətinin üzvü, Əməkdar jurnalist Varis Yolçuyev qonaqları salamlayaraq kitab haqqında qısa məlumat verdi. Yolçuyev bu əsərin ölkənin dünəni, bugün və gələcəyi baxımından böyük əhəmiyyət daşıdığını şərh etdi.

Tədbirdə iştirak edən natiqlər kitabın gənclərin tərbiyəsində oynayacağı mühüm rolu xüsusi vurğuladılar. AMEA-nın müxbir üzvü, professor Sudeif İmamverdiyev bildirdi ki, "İlham Əliyev: Müharibənin qalibi, sülhün müəllifi" kitabının gənclərin vətənpərvərlik tərbiyəsinin inkişafına təsir edəcəyi gözlənilir. Professor qeyd etdi ki, bu əsər Prezident İlham Əliyevin müharibə və post-müharibə dövründəki fəaliyyətindən bəhs edir. Burada dövlətçiliyimizin tarixi baxımından çoxlu sayda faktlar yer alıb; gənc nəsil tərəfindən bu faktların öyrənilməsi olduqca vacibdir. Vəkillər Kollegiyası Tədris Mərkəzinin direktoru, professor Əmir Əliyev də eyni fikri dəstəklədi. O, əsərin gənc nəslin təlim-tərbiyəsində əhəmiyyətli yer tutacağına inandığını söylədi. Professorun sözlərinə görə, gənclər müasir biliklərə yiyələnməklə yanaşı, milli tarixi dərindən bilməli, vətənin maraqlarını qətiyyətlə müdafiə etməyi bacarmalıdırlar.

Filologiya üzrə fəlsəfə doktoru, yazıçı-publisist Şərəf Cəlilli kitabı polkovnik Cəlil Xəlilovun Prezident İlham Əliyevə olan sədaqətinin abidəsi adlandırdı. Şərəf Cəlilli vurğulayıb ki, bu əsər bir daha sübut edir ki, polkovnik Xəlilov Ulu Öndər Heydər Əliyev ideyalarını və Prezident İlham Əliyevin tövsiyələrini təbliğ edir. O, tarixi həqiqətləri gənc nəslə çatdırmaq üçün mühüm addımlar atır. Dövlət İdarəçilik Akademiyasının dekanı Elnur Əliyev isə çıxışında kitabın adının onun məzmunu haqqında hər şeyi dediyini söyləyib. O, əsərin Azərbaycan həqiqətlərinin təbliği baxımından böyük bir hadisə olduğunu vurğuladı. Modern İnkişaf və Ailə İctimai Birliyinin sədri Zərifə Quliyeva kitabı müəllifin xalq qarşısındakı növbəti xidmətlərindən biri kimi dəyərləndirdi. "Tarixi şəxsiyyətlər" jurnalının baş redaktoru Xəlil Qarəhmədov əsərin tarixi-siyasi önəminə diqqət çəkib, cəmiyyətdə böyük maraqla qarşılanacağına əminliyini ifadə etdi.

Tədbir zamanı bir sıra mükafatlandırma mərasimi də keçirildi. Müharibə, Əmək və Silahlı Qüvvələr Veteranları Təşkilatının Rəyasət Heyətinin üzvü, Birinci Qarabağ müharibəsi və əmək veteranı İmran Əbilovun 90 illik yubileyi qeyd edildi. O, bu münasibətlə Müdafiə Nazirliyinin Fəxri Fərmanı ilə təltif edildi. Həmçinin, Müharibə, Əmək və Silahlı Qüvvələr Veteranları Təşkilatı tərəfindən qiymətli hədiyyə ilə mükafatlandırıldı. Sonda polkovnik Cəlil Xəlilov çıxış edərək tədbir iştirakçılarına təşəkkür etdi. O, Prezident İlham Əliyevin Azərbaycan dövləti və xalqı qarşısındakı tarixi xidmətlərinin heç zaman unudulmayacağını, hər zaman böyük sevgi və minnətdarlıq hissi ilə xatırlanacağını dedi.