Ruben Vardanyan vəkildən imtina edib

Ermənistan vətəndaşı Ruben Vardanyanın sülh və insanlıq əleyhinə cinayətlər, müharibə cinayətləri və terrorçuluqla bağlı ağır ittihamlar üzrə cinayət işi üzrə məhkəmə prosesi oktyabrın 21-də Bakı Hərbi Məhkəməsində davam etdirildi. Hakim Zeynal Ağayevin sədrliyi ilə keçirilən açıq iclasda təqsirləndirilən şəxs rus dilində tərcüməçi, həmçinin özünün seçdiyi vəkillə təmin olunmuşdu. Hakim Zeynal Ağayev əvvəlcə prosesdə ilk dəfə iştirak edən zərərçəkmiş şəxslərə və onların hüquqi varislərinə məhkəmə heyətini, prokurorları və digər şəxsləri təqdim etdi. O, həmçinin qanunvericiliklə müəyyən edilmiş hüquqları və vəzifələri izah etdi. Proses davam edərkən Vardanyan məhkəməyə müraciət edərək müdafiəçisi Avraam Berman ilə təklikdə görüşmək istədiyini bildirdi. Məhkəmə bu vəsatəti qəbul etdi və iclasda qısa fasilə elan olundu.

Fasilədən sonra Ruben Vardanyan məhkəməyə yeni bir vəsatət təqdim edərək müdafiəçisi Avraam Bermandan imtina etdiyini söylədi. O, bu vəsatəti əsaslandırarkən əvvəlki məhkəmə iclaslarında səsləndirdiyi fikirləri təkrar etdi. Vardanyan ümumi şəkildə məhkəmə prosesindən narazı olduğunu bildirdi və bu səbəbdən vəkilindən imtina etdiyini qeyd etdi. Müdafiəçi Avraam Berman isə vəsatətin qəbul edilməsini məhkəmənin mülahizəsinə buraxdığını söylədi. Baş prokurorun böyük köməkçisi Vüsal Əliyev bu məsələyə münasibət bildirdi. O qeyd etdi ki, təqsirləndirilən şəxsin müdafiəçidən imtina etmək hüququ olsa da, qanunvericiliyin tələblərinə görə bu cür ağır cinayətlərdə tamamilə vəkilsiz qala bilməz. Buna görə də, Vardanyan başqa bir vəkillə müqavilə bağlamalı, ya da vəsaiti yoxdursa, dövlət tərəfindən yeni bir müdafiəçi təyin edilməlidir.

Ruben Vardanyan başqa bir vəkillə müqaviləsinin olmadığını təsdiqlədi. O, dövlət tərəfindən müdafiəçi təyin edilməsinə etiraz etmədiyini vurğuladı. Məhkəmə tərəflərin fikirlərini dinlədikdən sonra müşavirə etdi və qərar qəbul etdi. Qərara əsasən, Vardanyanın vəkil Avraam Bermandan imtinası qəbul olundu. Təqsirləndirilən şəxsin dövlət hesabına müdafiəçi ilə təmin olunması barədə qərar qəbul edildi. Bu qərar Azərbaycan Respublikasının Vəkillər Kollegiyasına göndərildi. Proses təxirə salındı və növbəti iclas oktyabrın 28-nə təyin edildi. Xatırladaq ki, R. Vardanyan təcavüzkar müharibənin aparılması, terrorçuluq, terrorçuluğu maliyyələşdirmə, zorla yoxa çıxarma, işgəncə, muzdluluq, qanunsuz sahibkarlıq, qəsdən adam öldürmə, və dövlət sərhədini qanunsuz keçmə kimi fərqli maddələrlə ittiham olunur.