Ruben Vardanyanın məhkəməsi sənədlərin elan olunması ilə davam etdirilib

Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi dekabrın 5-də davam etdirilib. Bakı Hərbi Məhkəməsində keçirilən açıq məhkəmə iclasına hakimlər Zeynal Ağayevin sədrliyi ilə, Anar Rzayev və Camal Ramazanovdan ibarət heyət baxır. Ehtiyat hakim Günel Səmədova da iclasda iştirak edir. Təqsirləndirilən şəxs üçün tərcüməçi, habelə müdafiəsi üçün dövlət hesabına vəkil təmin olunub. Məhkəmədə çıxış edən hakim Vardanyanın özünün bildiyi dildə, yəni, rus dilində danışmaq imkanı olduğunu bildirdi. Məhkəmə heyəti dekabrın 5-də keçirilən iclasda iş üzrə sübuti əhəmiyyət kəsb edən sənədlərin elan olunması prosesinə başladı.

Hakim Zeynal Ağayev iclasda ilk dəfə iştirak edən zərərçəkmiş şəxslərə və onların hüquqi varislərinə məhkəmə heyətini, dövlət ittihamını müdafiə edən prokurorları və tərcüməçiləri təqdim etdi. O, həmçinin onların qanunvericiliklə müəyyən edilmiş hüquqlarını və vəzifələrini izah etdi. Məhkəməyə sədrlik edən bildirdi ki, iş üzrə zərərçəkmiş şəxs qismində tanınmış bir qrup şəxs əvvəlki proseslərdə iştirak edə bilmədikləri üçün məhkəməyə müraciət ünvanlamışdı. Bu şəxslər ilkin istintaq zamanı verdikləri ifadələrini təsdiqləyən ərizələr göndəriblər. Tərəflər həmin ifadələrin məhkəmədə oxunmasına etiraz etmədilər. Daha sonra iclasda zərərçəkmiş şəxs qismində tanınmış bir qrup şəxsin ifadələri, cinayət işi materiallarında olan ekspertiza rəyləri, protokollar və iş üzrə digər sənədlər elan olundu.

Ruben Vardanyan Azərbaycan Respublikası Cinayət Məcəlləsinin müxtəlif ağır maddələri ilə ittiham olunur. İttihamlar arasında 100.1, 100.2 (təcavüzkar müharibəni planlaşdırma, hazırlama, başlama və aparma), 107 (əhalini deportasiya etmə və məcburi köçürmə), 113 (işgəncə), 114.1 (muzdluluq) və 115.2 (müharibə qanunlarını və adətlərini pozma) yer alır. O, həmçinin beynəlxalq humanitar hüquq normalarını pozma ilə bağlı maddələr üzrə ittiham edilir. Daha ciddi ittihamlar qəsdən adam öldürmə (120-ci maddənin müxtəlif bəndləri), terrorçuluq (214-cü maddə) və terrorçuluğu maliyyələşdirmə (214-1) ilə bağlıdır. Vardanyan, həmçinin cinayətkar birlik yaratma və Azərbaycan Respublikasının dövlət sərhədini qanunsuz keçmə (318.2-ci maddə) ilə də ittiham olunur. Məhkəmənin növbəti iclası dekabrın 8-nə təyin olunub.