Xankəndidə 23 evin təmiri 1,4 milyon manata başa gələcək

Xankəndi şəhərində 23 fərdi yaşayış evinin təmiri işlərinə start verilir. Bu böyük layihənin ümumi dəyəri 1,414 milyon manat təşkil edəcək.

Bu işlərin icrası ilə Xankəndi şəhərində, Ağdərə və Xocalı rayonlarında fəaliyyət göstərən Bərpa, Tikinti və İdarəetmə Xidməti məşğul olur. Qurum artıq lazımi hazırlıq işlərini bitirib. Xidmət təmirin həyata keçirilməsini "Bərpa AS" Məhdud Məsuliyyətli Cəmiyyətinə (MMC) həvalə edib və bununla bağlı müvafiq müqavilə imzalayıb.

Müqaviləyə əsasən, "Bərpa AS" MMC şirkətinə 1,414 milyon manat məbləğində ödəniş edilib. Bu hesablamaya görə, bir evin təmiri təxminən 61,5 min manata başa gələcəkdir. Təmir işlərini aparacaq "Bərpa AS" MMC isə 2010-cu ildə dövlət qeydiyyatına alınıb. Şirkətin qanuni təmsilçisi Şxaliyev Rafiq Mubaris oğludur. Qeyd etmək lazımdır ki, şirkətin nizamnamə kapitalı cəmi 10 manatdır.