Qəzaya uğrayan təyyarə heyəti ilə bağlı acı xəbər

Gürcüstan ərazisində qəzaya uğrayan Türkiyə Hərbi Hava Qüvvələrinə məxsus "C130" tipli hərbi nəqliyyat təyyarəsinin bütün ekipaj üzvü həlak olub. Təsdiqlənmiş məlumatlara görə, dağlıq ərazidə baş verən qəza nəticəsində təyyarənin göyərtəsində olan 20 nəfərin hamısı dünyasını dəyişib. Bu faciəvi hadisə Sıqnaxi bələdiyyəsində qeydə alınıb.

"AnewZ" telekanalının müxbiri Nini Nikoleişvili bu acı xəbəri hadisə yerindən bildirib. Təyyarənin qalıqları Xolaqiri monastırının yaxınlığındakı dik yamaclara səpələnmişdi. Qalıqları ilk dəfə yerli sakinlər aşkar ediblər. Əraziyə cəlb edilən axtarış-xilasetmə qrupları və helikopterlər çətin relyefdə və zəif görmə şəraitində işləyir.

Qəzanın səbəblərinin araşdırılması üçün Gürcüstanda mümkün aviasiya təhlükəsizliyi pozuntusu ilə bağlı cinayət işi başlanıb. İstintaq və əməliyyat işləri koordinasiyalı şəkildə həyata keçirilir. Bu işlərin aparılması üçün Türkiyə və Azərbaycanın birbaşa dəstəyi təmin edilir. Hər iki ölkə qəzanın səbəblərini müəyyənləşdirmək və lazımi dəstəyi göstərmək üçün Gürcüstanla yaxından əməkdaşlıq edir.