Robot Boksçuların İlk Döyüşü!

Çinli Unitree şirkəti, insanabənzər robot texnologiyalarında yeni bir səhifə açır. Şirkətin G1 model robotları, 25 may tarixində Çinin Hançjou şəhərində keçiriləcək dünyanın ilk insanabənzər robot boks yarışında ringe çıxacaq.

Mech Combat Arenada baş tutacaq bu hadisə, Çin Media Qrupu (CMG) tərəfindən dünyaya canlı yayımlanacaq. Tədbirdən əvvəl keçirilən təqdimatda, G1 robotları Hançjouda bir məktəbdə tələbələr qarşısında öz bacarıqlarını nümayiş etdirdilər. Robotların döyüş bacarıqları ilə yanaşı, dözümlülüyü də sınandı. 40 dəqiqə fasiləsiz işləmələri idman zalında böyük maraqla qarşılandı və bu, yaxınlaşan yarış üçün bir növ stress testi oldu.

Ringe çıxacaq robotların idarəetmə sistemi üç fərqli üsulla təmin olunur. Unitree Robotics marketinq qrupundan Çu Yanq bildirib ki, robotlar sadə bir pultla idarə olunur. Lakin, yarışda bu üsula əlavə olaraq iki yeni idarəetmə mexanizminin istifadə olunacağı qeyd edilib.

Robot boks yarışması iki əsas hissədən ibarət olacaq. Birinci mərhələdə nümayiş döyüşləri keçiriləcək. Burada robotlar fərdi və qrup halında öz bacarıqlarını göstərəcəklər. İkinci mərhələ isə turnir formatında keçiriləcək. Operator kreslosundakı insanlar real vaxt rejimində robotları idarə edərək birinci yer uğrunda mübarizə aparacaqlar.

Bu tədbir yalnız bir idman yarışması kimi deyil, həm də robotikada məlumat toplama və insan hərəkətlərinin təqlid edilməsi qabiliyyətlərinin inkişafı baxımından böyük əhəmiyyət kəsb edir.