UNEC və Pekin Xarici Dillər Universiteti əməkdaşlığa başlayır (FOTO)

Çinin Pekin Xarici Dillər Universitetinin (PXDU) nümayəndə heyəti Azərbaycan Dövlət İqtisad Universitetində (UNEC) rəsmi səfərdə olub. UNEC-in rektoru, professor Ədalət Muradovla keçirilən görüşdə iki ali təhsil ocağı arasında gələcək əməkdaşlığın yolları müzakirə edilib.

Görüşün əsas nəticəsi tələbə və müəllim mübadiləsi proqramlarının, eləcə də "xarici dil + iqtisadiyyat" istiqamətində ikili diplom proqramının reallaşdırılması haqqında razılıq olub. Bu əməkdaşlıq çərçivəsində UNEC-də Xarici Dillərin Öyrənilməsi Mərkəzinin yaradılması, UNEC müəllimləri üçün ingilis dili üzrə təlimlərin təşkili və birgə elmi konfransların keçirilməsi planlaşdırılır. Rektor Ədalət Muradov UNEC-də ingilis dilinin tədrisində beynəlxalq standartların tətbiq edildiyini vurğulayıb. Əsas məqsəd UNEC məzunlarının minimum orta səviyyədə ingilis dilinə yiyələnməsini təmin etməkdir. O, bu istiqamətdə PXDU-nun zəngin təcrübəsini öyrənməkdə maraqlı olduğunu bildirib.

Professor Muradov həmçinin universitetdəki rəqəmsallaşma prosesindən danışdı. O qeyd etdi ki, tədris və idarəetmə tamamilə rəqəmsallaşdırılıb, yaxın zamanda bu sistemə süni intellekt texnologiyalarının inteqrasiyası nəzərdə tutulur. Bu məqsədlə UNEC-də Süni İntellekt laboratoriyasının yaradılması mühüm addımlardan biri olacaq. Rektor, 2019-cu ildən etibarən Heydər Əliyev Fondunun vitse-prezidenti Leyla Əliyevanın təşəbbüsü ilə Konfutsi İnstitutu tərəfindən 500-dən çox gəncin onlayn Çin dili kurslarında iştirak etdiyini də əlavə edib.

PXDU-nun vitse-prezidenti Zhao Gang, UNEC-in beynəlxalq reytinqlərdəki uğurlu mövqeyini və tədrisin rəqəmsallaşdırılması sahəsindəki nailiyyətlərini yüksək qiymətləndirdi. Zhao Gang qeyd edib ki, Pekin Xarici Dillər Universitetində Azərbaycan dili də daxil olmaqla 101 fərqli xarici dil tədris olunur. Onlar həmçinin xarici dil öyrənməyə dəstək verən “MOG” adlı bir platformadan istifadə edirlər. Görüş tərəflər arasında təcrübə mübadiləsi, birgə layihələrin və tərcümə işlərinin həyata keçirilməsi üçün geniş perspektivlər açır.