Dünyanın ən zəngin mətbəxi bu ölkədədir

Məşhur "Tasteatlas" nəşri dünyanın ən zəngin mətbəxinə sahib olan yüz ölkənin adını açıqlayıb. Bu sıralama qlobal kulinariya dünyasında böyük marağa səbəb oldu. Nəşrin gəldiyi qənaətə görə, yer üzündə ən dadlı yeməklər İtaliyada bişirilir.

Buna görə də, dünyanın ən zəngin mətbəxinə sahib olan ölkə kimi İtaliya birinci sırada qərarlaşıb. Qeyd edək ki, bu beynəlxalq sıralamada ikinci yeri Yunanıstan, üçüncü yeri isə Peru tutdu. İlk beşliyə həmçinin Portuqaliya və İspaniya mətbəxləri daxil ola bildi. Portuqaliya siyahıda 4-cü yeri, İspaniya isə beşinci yeri tutub.

Region ölkələrindən qardaş Türkiyə isə ilk onluğa düşərək yeddinci sırada yer aldı. Sıralamada əsasən Avropa və Cənubi Amerika ölkələri üstünlük təşkil etsə də, Azərbaycan da siyahıda qeyd olunub. Azərbaycan zəngin mətbəxi ilə öyünən yüz ölkə arasında 67-ci yerdə qərarlaşdı. Bu nəticə milli mətbəximizin dünya kulinariya xəritəsindəki yerini göstərir.